O pasado domingo celebrouse a asembleia anual da Asociación para a Cooperación con Cabo Verde-ACCVE, na Casa do Mar de Burela, onde se informou sobre o andamento dos proxectos que se están desenvolvendo no arquipélago africano e se renovou a súa Xunta Directiva.
Entre os diversos asuntos tratados, destaca a preocupación das socias e socios pola situación das comunidades inmigrantes en Burela, onde se percibe un deterioro da súa situación no contexto de crise actual, que ten levado a moitas persoas estranxeiras ao desemprego e nalgúns casos a unha situación de irregularidade sobrevenida tras anos de residencia na localidade. Tamén preocupa a situación escolar da chamada segunda xeración, marcada polo fracaso escolar e o reforzo do modelo de separación nos anos recentes. Considérase que estas problemáticas non están atopando respostas axeitadas dende as administracións, que continuan defendendo a idea de que Burela constitúe un modelo de integración, sen preocuparse por abrir novas vías de intervención que den resposta aos novos problemas.
ACCVE solidarízase con Conrado Semedo, nacido en Bembibre (León) fai 33 anos de pai e nai caboverdianos, que se encontra no Centro de Internamento de Estranxeiros (CIE) de Madrid, á espera de ser deportado a Cabo Verde, despois de ter cumplido unha condena de tres anos de prisión por un delito menor. Conrado, que ten familia entre a comunidade caboverdiana da Mariña, non ten a nacionalidade española a pesar de ter nacido en territorio español. Mentres se encontraba en prisión, o seu permiso de residencia caducou, sen que lle fose permitido á súa nai renovalo, ficando en situación irregular. No día en que rematou a súa pena, foi conducido directamente pola policía ao CIE de Madrid, dende onde o venres pasado tentaron deportalo, sen conseguilo.
A súa familia e amig@s emprenderon unha campaña de asinaturas en change.org para tentar deter a expatriación, que está a ser apoiada por numerosas persoas e colectivos (entre eles, a Campaña Estatal por el cierre de los centros de Internamiento de Estranjeros e SOS Racismo) e está a ter un amplo eco mediático.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
O sindicato denuncia a decisión unilateral da empresa de retirar días de descanso e implantar quendas que dificultan a conciliación. As concentracións serán nos centros de traballo de Foz (Uxío Novoneira s/n) e Ribadeo (Avda. Galicia 27). Lémbrase que non é unha folga e apélase á solidariedade da plantilla para defender as condicións laborais conquistadas.
O evento ofrecerá mel, produtos de tempada, artesanía, gastronomía e outras propostas locais. O Concello do Valadouro mantén aberto o prazo de inscrición para persoas e empresas expositoras, que poden presentar a súa solicitude na sede electrónica ou nas oficinas do Centro Socio-cultural, Xuvenil e da Terceira Idade “Manuel Lourenzo” ata o martes 6 de outubro, ou ata completar os postos dispoñibles.
Ás 15:15 horas deste martes, un particular solicitou asistencia sanitaria tras a caída dun raio no lugar de Castro de Igrexa (Cazás, Xermade). Varias persoas sentiron os efectos da descarga eléctrica e unha delas quedou atolada. Tras dar aviso ao Servizo de Urxencias Sanitarias de Galicia-061, Garda Civil e Protección Civil, a persoa afectada foi evacuada consciente ao Hospital Universitario Lucus Augusti.
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas.
A viaxe, enmarcada no proxecto «Relevo Xeracional: O Futuro do Mar» e organizada en colaboración co GALP Itsas Garapen Elkartea, permitiu achegarse a iniciativas como Kofradia Basque Seafood, a Escola de Pesca de Ondarroa, AZTI, Albaola ou o Itsas Museo de Donosti, así como a proxectos vinculados directamente á actividade pesqueira e á divulgación, incluíndo o uso de realidade virtual. O intercambio con Euskadi permitiu coñecer modelos que combinan formación, investigación, transmisión do coñecemento e modernización do sector, contribuíndo a identificar novas vías para facilitar a incorporación da mocidade á actividade pesqueira e garantir a continuidade das comunidades costeiras galegas.
Os servizos sanitarios trasladaron ao hospital a tres persoas implicadas nunha colisión frontal en Castro de Rei. Unha delas tivo que ser excarcerada polos Bombeiros de Vilalba. Contra as 11:15 horas deste martes, un particular informou ao 112 Galicia dun choque entre dous vehículos no quilómetro 71 da N-640, á altura da parroquia de Viladonga. Desde o punto, os alertadores sinalaron que unha persoa permanecía atrapada. Desde o Centro Integrado de Atención ás Emerxencias activouse un operativo no que participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada. Os bombeiros liberaron á persoa, que foi trasladada xunto con outros dous feridos ao hospital en ambulancia.
