Subcampionato de España de tiro con arco en sala cadete para Gabriel Galante nunha final galega

O VII Campionato de España en Sala para as categorías cadete e menores de 14 anos, celebrado en Cambrils (Tarragona), “marca un fito histórico”, segundo manifesta o presidente da Federación autonómica; xa que é a primeira vez que Galicia disputa unha final nacional.

E é que o resultado non pudo ser mellor para o tiro con arco galego tras conseguir o campionato, subcampionato e terceira posición por equipos na categoría cadete. E entre eses resultados, destaca a segunda posición de Gabriel Galante Briones, do club de tiro con arco IADOVI de San Cibrao, que foi derrotado no quinto set da final polo arqueiro pontés Daniel Castro Barcala, do Club Sílex.

Os dous montruos galegos do tiro con arco enfrontándose novamente nunha final. Moi centrados no primeiro set, comeza a festa de noves e deces con empate 1-1-. No segundo set, Dani falla a primeira frecha, aínda que moi pegada ó nove, resulta ser un oito e é a que determina o gañador do set con vantaxe para Gabriel, 3-1. No terceiro set Dani está máis fino e logra o set e con iso o empate. Xa estamos 3-3 e no cuarto set Gabriel e Dani están que se saen nun empacho de deces que fai que empaten o set e o resultado acumulado é de 4-4. Dani logra a máxima puntuación (30) no quinto set, e aínda que Gabriel non se queda atrás, non é tan certeiro e so consegue 29 puntos, set e partido que se diría en tenis. Daniel Castro proclámase campión de España cadete e Gabriel Galante, subcampión, a pesar de que nas series clasificatorias, non conseguía situarse en moi boa situación logrando a novena praza con 544 puntos, 18 por debaixo da súa última marca.

Eliminatoria
O mesmo sábado celebrouse a súa primeira eliminatoria polo sistema de sets na ronda correspondente ao 1/16, enfrontándose ó representante catalán Carlos Alcázar Peñalver, o cal vence cun contundente 7-1. O domingo pola mañá reiniciábanse ás nove da mañá as series eliminatorias. Esta vez na ronda 1/8 tócalle cun vello coñecido, o asturiano Eduardo Muñoz Suárez, e como nas veces anteriores, Eduardo púxollo difícil. Empezan empatando o primeiro set, o segundo e incluso o terceiro. Os noves e deces sucédense un tras outros. Ambos arqueiros non se dan tregua. Así, non é ata a segunda frecha do cuarto set onde Gabriel logra unha pequena vantaxe, Ó representante asturiano cólaselle a frecha no oito e Gabriel aproveita a oportunidade sentenciando o set ó seu favor cun certeiro dez que o aventaxa en dous puntos ó seu rival. Na terceira frecha continua a vantaxe. Set para Gabriel cun resultado de 5-3. Inicia o quinto set e, de forma parecida ó anterior, os noves e deces se suceden. Outra vez o asturiano non soporta a presión e estrela a súa última frecha na zona do oito; mentres que Gabriel afina e logra vantaxe cun nove facéndose co set que lle traslada a cuartos de final onde lle toca contra o favorito: o ibicenco Andrei Aghiorghiesei, un arqueiro máis experimentado que minimizaba as súas ilusións de subir ó podio.

Gabriel non se achicou e deu batalla rematando o primeiro set cun empate a 29 puntos. O segundo comeza tamén con tensión no ambiente tras dous deces certeiros de ambos. Na segunda frecha Andrei comete un fallo que dará vantaxe a Gabriel; xa que por pouco se estrella na zona do oito moi próxima do nove. Gabriel consegue o nove claro e aventaxa nun punto cambiando o set ó seu favor 3-1. No terceiro set Andrei perde concentración e Gabriel anótao tamén por un punto de diferenza, 5-1. O cuarto set que lle podía dar a vitoria faise eterno. Andrei remata primeiro con 29 puntos, mentres que Gabriel se toma o seu tempo xa que leva dous deces e cun nove empataría. Sería suficiente, pero quere máis e prolonga o seu tiro estrellando a súa terceira frecha no dez consiguindo a vitoria por 7-1 derribando ó favorito.

En semifinais Gabriel consegue unha cómoda vitoria contra o representante balear, Álvaro Fernández Martín, logrando un 6-0. Pola contra, o seu compañeiro galego tivo que verse contra Josu LLarramendi Alonso, do País Vasco, conseguindo a vitoria por 6-4 tras uns momentos de infarto que ofreceron a posibilidade de disputar unha final con sabor galego.

Menores de 14 anos
O outro arqueiro do club IADOVI, Ángel Galante Briones, con tan so 10 anos de idade, tamén sorprendeu, a pesar de non conseguir un resultado tan chamativo coma o do seu irmán. Aínda así, logrou superar a súa marca de adestramento na súa primeira participación nun campionato nacional nesta distancia e con esa diana: 18 metros e 80 centímetros reducida.

Ángel logra a 37ª posición con 474, superando a súa marca de 425, na categoría para menores de 14 anos onde superou a arqueiros de máis idade e experiencia nesta distancia e diana na que empregou arco e frechas de iniciació.

Equipos mixtos
En equipos mixtos, Galicia tamén pisou o podio logrando a terceira praza mediante o sistema de suma de puntuacións obtidas nas series clasificatorias polos arqueiros Daniel Castro Barcala, Gabriel Galante Briones e Taylor Murias Azevedo (do club Arcobarco do Barco de Valdeorras).

Novos retos
Agora queda pensar nos próximos retos marcados por Gabriel para este ano. Entre eles, a tirada de clasificación a celebrarse en Madrid o vindeiro 29 de marzo para o campionato de Europa cadete que se celebrará en LJUBLJANA (Eslovenia) sendo valedeiro para os xogos olímpicos para a xuventude que se disputarán en Nanking (China).