Os parques de bombeiros de Barreiros, Vilalba e Viveiro atenderon un total de 114 incidencias no primeiro trimestre do 2014, das cales 46 -o 40,3% do total-, foron incendios ben en edificios, vehículos ou lumes forestais. Este tipo de incidencias está seguido, aínda que a boa distancia, por 6 rescates e excarceracións de persoas.
En canto á distribución temporal, febreiro foi o mes no que se rexistrou o maior número de incidencias atendidas polos profesionais destes tres parques, un total de 54, seguido de xaneiro, con 36, e marzo, con 24. Estas 114 incidencias supoñen un 27% por cento máis das atendidas nos tres primeiros meses de 2013, no que se atenderon 83, e un 20,2% máis que no 2012 (91).
Os datos por parques son os seguintes: Barreiros levou a cabo o maior número de intevencións no que vai de ano, 52, das cales 14 producíronse no Concello de Ribadeo; 13 no de Foz; 10 no de Burela; 9 en Barreiros; 2 no Concello de Lourenzá, e 1 nos Concellos de Mondoñedo, Trabada, Riotorto, ás que hai que sumar unha á que acudiron malia non ser a súa zona da actuación. Tras o de Barreiros, é Vilalba o parque con máis actuacións. As 33 incidencias atendidas rexistráronse nos Concellos de Vilalba (13); 3 nos Concellos da Pastoriza; Begonte; Guitiriz; Outeiro de Rei, e Xermade. As restantes 5 actuacións producíronse en Concellos fóra da súa zona. Finalmente, o complexo de Viveiro rexistrou 29 incidencias, 24 das cales foron no propio Concello; 3 no de Xove e 2 no de Cervo.
Segundo os informes elaborados polos profesionais destes Parques, as horas nas que rexistran un maior número de incidencias, son as comprendidas entre as 10:00 e as 12:00 horas e as 16:00 e as 19:00 horas en días laborables.
Próximas actividades dos Parques
Ademais de atender as emerxencias, os profesionais do Consorcio Provincial de Bombeiros manteñen unha intensa axenda de actividades didácticas para colexios de toda a provincia, ben nos propios centros educativos, ben nalgún dos 6 complexos integrados na entidade, así como para outros colectivos.
A través de visitas, demostracións e simulacros, lucenses de todas as idades poden coñecer da man dos profesionais que traballan nos parques a transcendental labor e modo de funcionamento deste servizo, os medios técnicos e humanos dos que dispoñen, así como pautas de conduta básicas ante posibles emerxencias que poidan ocorrer.
Este tipo de actividades do Consorcio Provincial continúarán coa realización dun simulacro de evacuación por incendio no IES Xograr Afonso Gómez, de Sarria, o día 24 de abril, que levarán a cabo os profesionais do parque situado na localidade. Estes serán tamén os encargados de recibir ós alumnos da Escola de Educación Infantil de Sarria o día 30 deste mesmo mes, para que estes poidan coñecer de primeira man o funcionamento dun servizo de emerxencias. Pola súa banda, os bombeiros do complexo de Chantada tamén levarán a cabo un simulacro de incendio nas instalacións de Asistencia Integral Personalizada, S.L., de Bóveda, o vindeiro 7 de maio.
Tanto os centros educativos -ben a través da dirección ou da Asociación de Nais e Pais (ANPA)-, como outros colectivos da provincia poden solicitar a participación neste tipo de actividades poñéndose en contacto co parque de bombeiros radicado na súa localidade ou co máis próximo á mesma.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
