CIG Saúde A Mariña denuncia o “engano de Feijóo á cidadanía da Mariña co anuncio da inmediata ampliación do Hospital da Costa”

Dende CIG Saúde A Mariña “esixen que se deixen de mentiras, de manipulacións, de falacias e que demostren que teñen vontade de ampliar o Hospital da Costa destinando unha partida económica executábel nos vindeiros orzamentos 2015 da Xunta para iniciar de xeito inmediato as tan prometidas obras de ampliación”.

Ante o anuncio de Núñez Feijóo da inminente ampliación do Hospital da Costa dende CIG Saúde A Mariña denuncian que “xa no ano 2009, recen chegado á presidencia da Xunta, anunciaba na festa da faba de Lourenzá que ía ampliar o Hospital da Costa. No ano 2012, logo das mobilizacións da poboación da Mariña en defensa de manter a xestión da sanidade da nosa Comarca, novamente anuncia a inmediata ampliación do noso Hospital cun único propósito, confundir á poboación e disolver as protestas”.
Lembran que tamén en abril de 2013, “volven facer campaña publicitaria de ampliación do Hospital da Costa, coa publicación no DOG.(19 de abril de 2013)da oferta da licitación do Plan Director que, ano e medio despois, apróbase no Consello da Xunta do 18 de setembro por un importe de 112.530€”.

Dende CIG Saúde “consideran que as declaracións de Feijóo en canto á aprobación no Consello da Xunta da licitación dun Plan Construtor e a inmediata ampliación do Hospital da Costa son un auténtico insulto e unha falta de respecto á veciñanza, xa que o único que se aprobou foi adxudicar a redacción do Plan Director”.

Dende a central nacionalista “aseveran que o Plan Director non é mais que un estudio das necesidades que en materia de sanidade ten a comarca da Mariña, e que para nada é garante de que se vaia ampliar o Hospital da Costa. De feito é o terceiro Plan Director que se executa ao longo da vida do centro sanitario sen que ningún culminase en ampliación”.

Dende CIG Saúde A Mariña denuncian “as mentiras de Feijóo en canto á súa preocupación e compromiso coa viabilidade económica da sanidade pública, xa que o seu verdadeiro compromiso é coa PRIVATIZACIÓN e acúsano de propaganda electoral que só busca enganar e manipular aos mariñaos e ás mariñássen o mais mínimo pudor, nun tema tan sensíbel como é a saúde”.

Para a central nacionalista no Partido Popular “o que están é comprometidos cos recortes, cos repagamentos, coa amortización de prazas no sistema público galego de saúde (destrúen 90 de cada 100 vacantes por xubilacións), medidas todas elas encamiñadas a deteriorar a sanidade pública cun único fin, PRIVATIZAR e entregar a empresas amigas, que buscan grandes beneficios, a nosa sanidade tal como están facendo co novo Hospital de Vigo, a ampliación do Hospital de Ourense, os servizos de mantemento, electromedicina, as unidades de esterilización, a central de compras…

“Este é o compromiso de Feijóo, entregar o noso patrimonio sanitario aos poderes económicos sedentos de lucro, facendo deste xeito insostíbel e inviábel o futuro da nosa sanidade pública”, aseveran.

Así mesmo, o delegado da CIG-Saúde A Mariña, Adolfo Corral, esixe que “se deixen de mentiras, de manipulacións, de falacias e que demostren que teñen vontade de ampliar o Hospital da Costa destinando unha partida económica executábel nos vindeiros orzamentos 2015 da Xunta para iniciar de xeito inmediato as tan prometidas obras de ampliación”.

En Burela a 12 de setembro de 2014.