González Barcia mantivo un encontro coa nova directiva de ACIA Burela

Burela, 27 de novembro de 2014. O alcalde, José Mª González Barcia, e o concelleiro de Economía e Industria, José Casas, mantiveron este xoves un encontro coa nova directiva de Acia Burela á que lle propuxeron que dean un paso adiante para constituír un Centro Comercial Aberto na localidade. O rexedor subliñou o traballo realizado pola directiva saínte e desexoulle moitos éxitos á entrante.

José Mª González Barcia explicou que “era a primeira toma de contacto coa nova xunta directiva da Acia e foi positiva. Nós imos manter a mesma colaboración que coa anterior directiva, por suposto; dixémoslles que a nosa intención é manter a subvención que este ano e no 2013 lle concedéramos á Acia, que son 18.000 euros”. E lembrou que “o local que ocupa a Acia está cedido polo Concello. Ademais dixémoslles que para calquera tipo de actividade que organicen poden contar con todos os recursos, tanto materiais como humanos, que temos no Concello”.

O rexedor dixo que “eles están empezando como xunta directiva e propuxémoslles que dean un paso adiante para estudar e valorar a posibilidade de constituír en Burela un centro comercial aberto, ao igual que se fixo en Foz e que é unha idea que nós xa manexamos nos anos 2006 e 2007 e que quedou aparcada”.

Para o equipo de goberno “Acia Burela desenvolveu ata agora unha actividade importante, polo que é de xustiza agradecerlle á directiva saínte todo o traballo que fixeron. Saben que contaron sempre coa colaboración deste equipo de goberno e puxémoslle de manifesto á nova directiva que vamos seguir nesa liña, apoiando todas as actividades da Acia, pero eles teñen que darse conta de que os recursos do Concello son limitados. Polo tanto deben entender que en certos momentos non poidamos dar máis. Cremos que a axuda que dá o Concello é importante, nunca se dera un apoio por parte do Concello de Burela tan forte ás actividades que desenvolve o comercio local para a súa promoción como se fai agora”.

O alcalde indicou que “seguiremos tendo máis reunións, exactamente igual que facíamos coa anterior directiva, e á nova xunta desexámoslle moitos éxitos. Son xente nova, pero tamén hai persoas con moita experiencia e que seguramente que van saber conxuntar perfectamente unha cousa coa outra e van ter éxitos no seu traballo”.