Martínez: “Mentres a xente loita por chegar a fin de mes, o Partido Popular gasta miles de euros en propaganda”

O voceiro socialista na Deputación, Manuel Martínez, mostrou este venres a indignación do Goberno provincial ao comprobar como, “mentres a xente loita por chegar a fin de mes, o Partido Popular gasta miles de euros en propaganda”. “Deben sacar xa as facturas desta e das anteriores ocasións nas que dedicaron miles de euros a publicidade falsa porque, non é a primeira vez, nin a segunda, e deben explicar como as pagan. Os cidadáns esperamos que o PP explique de onde proveñen os cartos, sobre todo cando falamos dun partido continuamente ligado a supostos manexos ilícitos de diñeiro”, subliñou.

“Mentres máis de 23.700 lucenses están no paro, e mentres hai 8.500 fogares con fillos que sofren pobreza severa na provincia debido aos recortes brutais e á nefasta xestión da crise que fan os Gobernos de Rajoy e Feijóo, o Partido Popular dedícase a gastar diñeiro en publicidade falsa contra o que considera o seu inimigo para tratar de enganar aos cidadáns e tapar as súas vergoñas. Non o conseguen, teñen menos credibilidade que o seu gran colega, o pequeno Nicolás”, asegurou Martínez.

“Ao PP non lle importan os lucenses, senón unicamente seguir no poder, por iso recorren á mentira e ao carrexo de votos. Se realmente lle preocuparan os veciños da provincia, esixirían a Feijóo que dote dunha vez ao HULA dos servizos de Radioterapia, Medicina Nuclear e Hemodinámica as 24 horas, tal e como fixo esta semana o Presidente da Deputación no Parlamento, demostrando o seu compromiso con Lugo e cos lucenses”, argumentou o Deputado. “Para iso, o PP non move nin un dedo”, engadiu.

“As prioridades do PP non son o emprego nin o benestar social”
A actuación dos populares volve a deixar claro cales son as súas prioridades. “Non é o emprego. Dende que goberna Feijóo recortaron os fondos un 54% e Rajoy rebaixounos no 2015 en 4.500 millóns, deixando á xente sen traballo totalmente desamparada”, recalcou. A diferenza “é abismal: no seu último ano de goberno na Deputación, o PP destinou a emprego 18.030 euros, nós en 2015 dedicaremos 300 veces máis: 5,3 millóns de euros”, explicou Martínez.

A prioridade dos populares tampouco é o benestar social. A Deputación comezou a investir en emprego, e tamén en servizos sociais “cando chegou este Goberno. De 515.000 euros no 2007 co PP, pasamos a case 3 millóns de euros no 2015”, indicou.

O cambio da Deputación
“O PP ten que recorrer á mentira, á manipulación, á opacidade e ao carrexo de votos porque coa verdade na man non é capaz de rebater que, co actual Goberno progresista, a Deputación viviu unha mellora extraordinaria, tanto en calidade democrática e transparencia, como en xestión económica e investimentos”, explicou Manuel Martínez.

A Deputación de Lugo é hoxe “unha institución moderna, transparente, eficaz, sensible ás demandas dos lucenses, tamén nos seus orzamentos, e que ademais xestiona ben os fondos públicos cunhas contas totalmente saneadas e estables”, manifestou. Dende hai case 8 anos:

– Racionalizou os Gastos de Persoal ata baixalos en case 12 millóns de euros, sen recortar dereitos nin eliminar servizos.

– Foi a Deputación que máis reduciu en Gastos Correntes, 4,6 millóns de euros, e hoxe está entre as que menos porcentaxe do seu orzamento destina a este capítulo.

– O PP deixou presupostada no 2007 unha débeda de 122 millóns de euros. Este Goberno deixaraa a cero no 2016, é dicir, non lles quedará carga económica algunha ás xeracións futuras.

– Todo isto, mantendo ao mesmo tempo os investimentos. De feito, a de Lugo “é, con diferenza, a Deputación galega que máis inviste por habitante”, explicou o voceiro socialista.

Na Deputación de Lugo “demostramos que se goberna mellor desde a esquerda. Que hai unha alternativa clara, viable e solvente a unha dereita insensible, pechada en si mesma, que non fai máis que recortar dereitos aproveitando a crise para aplicar o seu ideario político máis radical, e que ademais se cruza de brazos ante a corrupción”, afirmou o Deputado.