Foz comeza o seu Entroido o sábado 31 de xaneiro coa coroación da raíña

Foz, 16 de xaneiro de 2015. O Concello de Foz ven de anunciar que comezará os seus actos de celebración do Entroido 2015 o sábado 31 de xaneiro. Ese día levarase a cabo a coroación da raíña do Entroido na vila, recoñecemento que este ano recaeu na rapaza focense Sandra Rey Oliveros. O acto de coroación terá lugar nunha cea que se celebrará a partir das 22.00 horas no pavillón do Colexio Martínez Otero, coma ven sendo habitual nos últimos anos. A cea estará composta de pratos típicos do Entroido e terá un custo de 23 euros. Posteriormente levarase a cabo un baile amenizado polo Dúo Epo-K, no que, como novidade este ano, só poderán participar os asistentes á cea. Os interesados poden anotarse antes do 29 de xaneiro na Delegación de Cultura do Concello de Foz.

O concelleiro de Cultura de Foz, Ánxel Paleo, adiantou que “o sábado día 31 de xaneiro ás 10 da noite darán comezo os actos do Entroido de Foz 2015. Farano coa cea de coroación da raíña do Entroido deste ano, Sandra Rey Oliveros, e as súas damas: Tamara Rodríguez González e Claudia Sánchez Bermúdez. A cea farase no pavillón do Martínez Otero, coma en anos anteriores, e o menú será o típico do Entroido: sopa de cocido, cocido, sobremesa, viño tinto e branco, café e chupito. O prezo da tarxeta non varía respecto a anos anteriores e mantense nos 23 euros por persoa. Todos aqueles que queiran asistir á cea poden apuntarse na Delegación de Cultura do Concello de Foz falando con Pili, que é a nosa técnica de cultura e a que se vai a encargar da organización das mesas”.

Paleo engadiu que “é importante destacar algo no que noutros anos non se poñía reparo, pero este ano tomouse a decisión de que toda aquela xente que non asista á cea non poderá acceder despois ao pavillón para o posterior baile. Ademais, este ano tamén nos esforzaremos un pouco máis no tema da calefacción para o pavillón, xa que o ano pasado pasamos todos un pouquiño de frío ao dispoñer só dun canón de calor e dun par de setas. Sen embargo, este ano xa contaremos cun par de canóns e catro setas para facer a noite máis agradable”.

O concelleiro de Cultura de Foz invitou “a tódolos veciños da Mariña, e como non, a tódalas peñas e grupos de Entroido que temos aquí, no concello de Foz, e que seguro que non faltan, coma tódolos anos. Dicirlles que para asistir á cea, a poder ser vaian todos disfrazados, para que así tódolos carnavaleiros gocen deste acto cos seus disfraces de gala e todos poidamos acompañar nesta noite tan especial á raíña e ás súas damas”.