Villares: “Grazas ós veciños de San Román por manter viva a memoria de Manuel Candia, por facer pobo e poñer en valor a historia da parroquia”

Cervo, 10 de xaneiro de 2015- O Concello de Cervo quixo amosar o seu apoio ao acto do centenario do grupo escolar de San Román que organizou a Comunidade de Montes da parroquia coa implicación dos veciños, a colaboración do goberno local e outras administracións. O alcalde de Cervo, Alfonso Villares, e varios membros do equipo de goberno asistiron ao acto. Na súa intervención, o rexedor destacou a importancia que tivo a escola para o desenvolvemento de San Román, e puxo en valor o altruísmo de Manuel Candia, veciño da parroquia que promoveu e financiou a escola.

Pero sobre todo, Villares fixo fincapé na “gratitude” que gardan os veciños, “porque seguides mantendo viva na vosa memoria a Manuel Candia, e así o demostrastes nun acto que tamén é unha forma de facer pobo, de recuperar a historia de San Román e de que todos nos sintamos orgullosos de cómo eran os veciños hai un século, e tamén de cómo sodes agora”. O mandatario tamén deu as grazas aos veciños “por querer tanto a vosa terra, por ese vínculo tan forte que vos une e por darlle tanto valor ao voso, ao igual que facía Candia, que dende a distancia sempre se acordou do seu San Román natal”.

Ao mesmo tempo, definiu ao benefactor da escola como un home “admirable, bondadoso, altruísta, arriscado, valente e humilde, que axudaba como o fan os filántropos de verdade, por un amor incondicional polas persoas, sen buscar recoñecementos nin fama”.

Villares asegurou que esta conmemoración tamén é unha forma “de resaltar o papel da educación na nosa sociedade” e de lembrar que Candia “fixo posible que centos de nenos da parroquia estudasen, se formasen polo seu futuro e mellorasen a súa calidade de vida”. “Por suposto nós, dende o Concello de Cervo, e seguro que todas as administracións, compartimos con Candia ese obxectivo, de fomentar unha sociedade do coñecemento, de apoiar a educación, e de conseguir que sexa para todos”.

“O valor do noso”
O alcalde tamén se referiu ao importante papel de Francisco Piñeiro nestes actos, e tamén ao libro que escribiu sobre a historia de San Román. Villares resaltou “a importante labor de investigación, de documentación, e a calidade do resultado, que nos sorprende con moitos datos inéditos e información moi fiable e valiosa sobre a parroquia”, destacando tamén a súa forma de traballar, baseándose en datos reais “acudindo ás fontes, buscando en libros, contactando coa Arxentina e dedicándolle máis tempo do que tiña”.

Pero ademais de agradecerlle este labor, quixo lembrar a súa implicación e preocupación polos demais. “Involucrado na cultura, no teatro…e por suposto no ensino. Outra cousa en común con Candia”. “Cada día descubrimos novas facetas túas. Para min, e seguro que para moitos alumnos teus, fuches máis ca un mestre. E agora séguesnos ensinando. Porque con este libro axúdasnos a saber máis sobre nós mesmos, e sobre a nosa historia”.

“Coñecendo a Paco como o coñezo, sei que lle tería gustado vivir aquela época de cambios, cunha nova escola chea de actividade, e ao mellor incluso ser mestre en San Román. Así podería contar a mesma historia que nos conta neste libro pero, nese caso, en primeira persoa”, remata o rexedor.