A Xunta destina 704.000 euros a renovar o equipamento de Protección Civil na provincia

Lugo, 27 de marzo de 2015.- O director xeral de Emerxencias e Interior, Luis Menor, e a delegada territorial da Xunta en Lugo, Raquel Arias, deron conta este venres en rolda de prensa do equipamento que a Xunta, a través da Consellería de Presidencia, Administracións Públicas e Xustiza, destina ás agrupacións de voluntarios de Protección Civil existentes na provincia de Lugo.

Trátase, en concreto, de sete pick-up, sete furgóns, seis remolques de emerxencia, unha embarcación, sete espalladoras de sal e unha carpa de posto de mando avanzado, que supón un investimento global de 703.333 euros.

Todo este equipamento será cedido aos concellos (de menos de 50.000 habitantes) que teñan agrupacións de voluntarios de Protección Civil, para que sexan empregados en programas de prevención de riscos e primeiras intervencións en emerxencias, previndo danos aos cidadáns, aos seus bens e ó medio ambiente ou, no caso de que estes acontezan, a minorar as súas consecuencias.

Segundo recalcou a delegada territorial, “Protección Civil é unha peza fundamental na atencións ás emerxencias” e agarda “que os cidadáns da comarca da Mariña, destinatarios últimos dos servizos prestados polos grupos de emerxencias, perciban, coa dotación deste novo equipamento, a mellora na prestación do servizo e se sintan, en consecuencia, máis protexidos ante calquera incidencia que poida acontecer”.

Detectores de gases tóxicos
Na mañá deste venres tamén tivo lugar o reparto de detectores de gases tóxicos e atmosferas explosivas que se poidan xerar no transcurso dunha emerxencia aos representantes dos sete Grupos de Emerxencias Supramunicipais (GES) constituídos na provincia en 2013: A Fonsagrada, Guitiriz, Becerreá, A Pontenova, Quiroga-Folgoso do Courel, Monterroso e Cervo.