As obras do novo faro de Burela seguen coa instalación de 60 esperas, traballos previos á colocación dos moldes e ó seu posterior fundido

Burela, 23 de abril de 2015.- As obras do novo faro de Burela continúan. Este xoves estanse a colocar 60 esperas. Trátase dos traballos previos para proceder despois á colocación dos moldes e ao seu posterior fundido, segundo deu a coñecer este mediodía o alcalde, José Mª González Barcia.

O rexedor explicou que “hoxe estanse a colocar no faro de Burela 60 esperas, que son unha especie de áncoras que se usan cando de retira formigón vello e se vai colocar formigón novo. Estes son os traballos previos para proceder á colocación dos moldes do faro e así comezar a fundilo”.

González Barcia indicou que “todo dependerá do tempo. Hoxe o estado da mar estivo moi ben. Pero a colocación dos moldes, que están no peirao, e o seu posterior fundido hai que programalos porque esta acción será realizada por un helicóptero. E o traballo deste aparato hai que programalo”.

O alcalde burelés dixo que “estes traballos previos confiamos en que conclúan a vindeira semana e a partir de aí, cando o tempo o permita, se empezarán a colocar os moldes e se empezarán a fundir”.

E insistiu en que “as obras dependen moito do estado da mar. Que estea ben estes días, estanos a permitir traballar sen problema”.