Lídia Senra califica de “burla” ás consumidoras e “ataque” ao sector o informe sobre sinalización de orixe no etiquetado

Estrasburgo, 21 de Maio 2015. A eurodeputada de Alternativa Galega de Esquerda en Europa (AGEe), Lídia Senra, calificou este xoves dende Estrasburgo como “unha auténtica burla para consumidoras e consumidores” o informe presentado no día de onte pola Dirección Xeral de Saúde e Seguridade Alimentaria da Comisión Europea no que argumentan que incluír a procedencia dos alimentos na etiquetaxe de produtos non transformados, produtos dun so ingrediente ou que supoñen máis do 50% do mesmo implicaría un encarecemento. “Todo o mundo sabemos que engadir unha liña máis na etiqueta que sinale a procedencia do produto non vai encarecer”, sinalou.

Para Senra, as conclusións deste informe, que en si mesmo “constitúe un ataque ao sector produtor do mexilón” , están motivadas porque “o que realmente lles encarece” é o feito de que “se poñen que o produto é galego teñen que mercar o mexilón na Galiza”, en tanto que se esta indicación non figura, “moitas cidadás e cidadáns mercaremos mexilón de marcas galegas ou asociadas a Galiza e pensaremos que estamos comendo mexilión galego”, alertou.

Dende AGEe temos claro que esta é “a verdadeira razón” pola que a gran industria se nega a que a etiquetaxe sexa obrigatorio, incluso malia a que as conclusións deste informe sinalen claramente que a inmensa maioría das consumidoras e consumidores prefire ter un información exahustiva dos alimentos que adquiren.

Neste contexto, a Comisión Europea “que responde unicamente aos intereses destes grandes industriais”, toma a iniciativa de “sacar un informe totalmente negativo e que atenta contra os dereitos das consumidoras e consumidores e contra o sector produtor”.

A eurodeputada galega fixo tamén un chamamento ao Presidente da Xunta de Galiza e á Conselleira do Mar “para que se poñan á cabeza das reivindicacións do sector produtor de Galiza” e que insten á Comisión Europea e a través do Ministerio “a que esta normativa cambie, a que sexa obrigatorio o etiquetado”.

Aliás, dirixiuse directamente aos deputados e deputadas do Partido Popular no Parlamento Europeo para que non adopten a mesma posición que na votación realizada fai uns meses ao respeito do etiquetado da carne, onde “votaron en contra de que fora obrigatorio o etiquetado porque o lobby industrial da carne así llo pedíu”.

Dende AGEe, “seguiremos apoiando ao sector e loitando por alcanzar todas as garantías posíbeis para os nosos alimentos, e estaremos moi pendentes do percorrido deste informe e da chegada desta proposta ao Parlamento Europeo”.

Xa en novembro do pasado ano AGEe presentou unha pregunta parlamentaria dirixida á Comisión para obter máis información ao respeito da consideración que tería o mexilón no referente a eitquetaxe – Rotulagem de produtos da pesca e da aquicultura no novo Regulamento-, insistindo neste aspecto cunha nova pregunta rexistrada no mes de febreiro -Rotulagem de alimentos-Resolução do Parlamento e relatórios-.