O PP da Mariña di que o BNG confunde a defensa da sanidade pública con “agarrarse á pancarta e facer de saltabarricadas”

A Mariña, 11 de maio de 2015.- O Partido Popular da Mariña lucense vén de saír ao paso das últimas declaracións efectuadas pola responsable comarcal nacionalista, Ana Ermida, e quixo deixar claro que no BNG confunden a defensa da sanidade pública con “agarrarse á pancarta e facer de saltabarricadas”

Os populares din que unha vez máis os nacionalistas non serán capaces de enganar aos veciños da Mariña, como xa intentaron noutros procesos electorais, nos que incluso chegaron a repartir folletos alertando dun falso peche do Hospital da Costa. O único que ten demostrado con feitos –e non con palabras- que cre, garante e amplía os servizos do Hospital é o Goberno Feijóo, fronte a nula credibilidade do BNG cando fala de sanidade.

Un feito: investimento cero co bipartito
Os populares van máis aló e lémbranlle a Ermida que cando o BNG tivo responsabilidade de goberno non foi quen, xa non so de impulsar a necesaria ampliación do Hospital -que hoxe está en marcha tras a aprobación do plan director- senón que ademais non tivo máis remedio que recoñecer, en resposta oficial e no Parlamento, que a Xunta bipartita non investiu un so euro en obras de mellora neste centro

Novos servizos, aposta firme pola ampliación
Fronte á sequía inversora e desprezo ás necesidades da sanidade pública comarcal que caracterizou ao bipartito, os populares contrapoñen os máis de 2,2 millóns de euros achegados en novos servizos e melloras no Hospital desde que o PP goberna na Xunta, así como a redacción e aprobación do seu plan director, que como explicou o Presidente Feijóo, é documento técnico que determinar como se fará a ampliación e remodelación do Hospital da Costa para ganar en atención hospitalaria e confortabilidade.