12 de xuño, Día dos Océanos no Vicedo

O Vicedo, 11 de xuño de 2015.- O pasado 8 de xuño celebrouse o Día dos Océanos con multitude de actividades por todo o mundo que viñan a intentar concienciar ós seus habitantes da importancia da conservación dos mesmos, ou millor dito, da recuperación do seu estado primixenio na meirande parte posibel.

A Asociación Nordés non quixo ser menos pero trocando a data para que mellor cadrara ás personiñas convidadas a participares, que non son outras que os nenos e nenas dos Colexios Públicos dos Concellos de Mañón e O Vicedo quenes, por primeira vez que se seipa, e grazas á colaboración do profesorado e dos pais e nais dos escolares, van pasar un día xuntos facendo actividades, xogos, aprendendo e disfrutando da natureza e tamén do teatro, pois tamén se inclúe no programa que desenvolvemos a continuación.

Así, pola mañá os alumnos e alumnas dos colexios devanditos desprazaranse xunto cos seus profesores á praia de Xilloi para facer unha recollida simbólica de lixo na praia, o arrincado de especies invasoras nas dunas, xogos sobre reciclaxe, charlas, etc… Os membros de Nordés Antonio Pernas (Técnico superior en xestión e organización de recursos naturais) e Pedro Yáñez (licenciado en ciencias ambientais) xunto con máis colaboradores serán os encargados de impartir estas actividades.

Xa pola tarde, ás 17h na Casa da Cultura do Vicedo, o grupo de teatro profesional Os Quinquilláns representará unha obra teatral seguindo a temática de respecto ao medio ambiente e, concretamente, do mundo mariño. A entrada é gratuíta e o espectáculo apto e recomendabel para menores e adultos.