O Concello de Burela arranxará a praza da Mariña, “que ata o de agora estivo bastante abandonada”, segundo Alfredo Llano

Burela, 14 de agosto de 2015.- O alcalde, Alfredo Llano, anunciou este venres ó mediodía as obras de mellora que o Concello realizará na praza da Mariña. Darán comezo a vindeira semana e consistirán no pintado e arranxo do quiosco da música, no pintado da fachada da praza de abastos e na colocación de varias fotos antigas neste marco. Deste xeito o Concello pretende convertela nunha referencia para acoller diferentes tipos de eventos.

Llano dixo que “queremos arranxar a praza da Mariña, que ata agora eu penso que estivo bastante abandonada; só hai que ver o quiosco da música, que está tremendamente abandonado, sobre todo na parte de arriba, no paraugas, polo que queremos modificalo”.

O rexedor declarou que “a praza da Mariña vamos preparala para que sexa moi atractiva á vista, que sexa cómoda para estar nela con todo o que hai alí. Ademais na antiga praza de abastos vamos procurar facer unha pintura moi apropiada para un pobo mariñeiro como é o noso, unha obra na que o mar ten que estar presente cuns motivos que lembren, identifiquen e reflictan o que é o noso concello. Para iso temos agora mesmo un obradoiro de pintura, que vai estar durante seis meses traballando para facer prácticas, e o queremos é que esa xente teña a oportunidade de manifestar a súa forma de facer as cousas. Dende logo que será un bo recordo dese obradoiro e vamos procurar que esa pintura sexa un reflexo bonito e agradable, que mellore moitísimo a vistosidade desa praza”.

As obras darán comezo a vindeira semana: “vaise comezar a facer esas pinturas para a semana que vén, pero tamén queremos arranxar o quiosco da música, cubrilo, poñelo ben e pintalo. E despois vamos completar a praza coa instalación de fotos antigas de mariñeiros de Burela, que xa foron expostas no anterior mandato no que estivemos nosoutros. Vamos lembrar moitos acontecementos, moita historia de Burela grazas a esas fotos que reflicten e identifican como se facían aquí as cousas. Imos tratar de lucilas en varios sitios da praza da Mariña para que no seu conxunto ese espazo público sexa moi agradable e dea valor ao noso concello”. E engadiu que “a partir da semana que vén vaise empezar con esas obras e contamos para finais de mes, de cara á celebración da Feira do Libro, que esa praza se atope nunhas condicións que a fagan moi agradable, moi vistosa e que sexa moi importante para o noso concello”.