O servizo de Protección Civil de Burela contará cun novo remolque, un xerador de electricidade e unha bomba achicadora de auga

Burela, 11 de setembro de 2015.- O servizo de Protección Civil de Burela conta con novas ferramentas logo de que os seus membros recolleran o pasado mércores un remolque, un xerador de electricidade e unha bomba achicadora, entre outros materiais, doados pola Xunta. Así o explicou o alcalde, Alfredo Llano, que asegura que deste xeito o servizo que se pode ofrecer dende Burela é máis completo.

O rexedor dixo que “este remolque e este materia que acabamos de recibir vainos servir para completar perfectamente o servizo de Protección Civil que estamos ofrecendo no Concello. Está extraordinariamente ben dotado porque trae moita ferramenta que nos vai facer falta en caso de que haxa necesidade de empregala, esperamos que non sexan moitas as ocasións, pero en caso de urxencia é bo ter estes materiais que se nos doa por parte da Xunta e que a partir de xa podemos ofrecer.

Llano dixo que “entre outras cousas se atopan, e a min pareceume moi interesante, un xerador de electricidade trifásico, que vai permitir coller enerxía de onde se precise nun momento de ausencia, como tamén unha bomba achicadora de auga que tamén é moi necesaria e que xa nos viña facendo falta e é moi interesante tela. E hai tamén unha serie de material complementario, como serras, faros, que completar perfectamente o que se precisa para ofrecer un bo servizo cando é necesario empregar Protección Civil. Por tanto, é boa cousa e interesante que o Concello se vaia facendo con material de calidade e que cando se precise estea aí e que responda, porque así compleméntase e dálle valor ao noso servizo de Protección Civil”.