Propostas que obrigan a actuar

Adrián Piñón Domínguez- Días atrás, sorprendíame nos medios unha nova en referencia ó concello do Vicedo, na que Jesús Novo, salientaba a posta en marcha de contactos desta institución con outras de ámbito Provincial ou Galego para poñer en marcha un centro de día, argumentando que esta era unha das dúas propostas máis importantes do programa electoral do partido do goberno.

Chamaba a atención semellante argumento, posto que, o programa electoral do Partido Popular do Vicedo é inexistente. Á veciñanza só se lle repartiu a famosa carta de Rajoy e Feijóo. Así sen máis. Nada de propostas para levar a cabo no Concello.

Agora ben, cabe destacar que logo de 14 anos á fronte do concello, o alcalde entrara na carreira das propostas, abrira os ollos e se dera de conta que sendo a maioría dos nosos veciños maiores de 65 anos -o 34% da poboación segundo o IGE- é necesario un centro de día que lles preste a este colectivo os coidados máis básicos.

Teño claro que o Bloque Nacionalista Galego do Vicedo está a demostrar que nos últimos comicios acadou a forza para non axeonllarse ante un goberno local inmóbil, e que impulsará iniciativas que favorezan a toda a veciñanza, obrigando ao goberno local a actuar. É por iso que, tal e como incluímos no programa, comezamos unha recollida de sinaturas no mes de xullo para presionar ao goberno local e que este iniciara os trámites necesarios para a creación dun centro de día.

Máis de 1.000 sinaturas despois, é unha ledicia para min, e para os meus compañeiros, que a nosa campaña, xa dea os seus froitos, e que a chegada de aire fresco a un concello anquilosado no pasado sirva para que as cousas muden, quedando claro que, sen as firmas e apoios das veciñas e veciños, falar disto a día de hoxe sería imposible. Sexa como fora, algo está cambiando no Vicedo.

Adrián Piñón Domínguez
Concelleiro e portavoz do BNG no Vicedo