Rosana Pérez reclama a Soria que derogue o sistema de interrumpibilidade eléctrico dados os perxuízos que está a causar ás industrias asentadas en Galiza

Madrid, 12 Setembro 2015. A deputada do BNG no Congreso, Rosana Pérez, presentou unha proposición non de lei e unha iniciativa parlamentar na Cámara Baixa na que insta ao Ministerio de Industria a derogar canto antes o sistema de interrumpibilidade baseado en subastas eléctricas.

“Dados os perxuizos que está a xerar en moitas industrias, é hora de que Industria derogue este sistema que unicamente está a reportar problemas de inestabilidade empresarial, encarecemento dos custes de produción, competencia desleal, e inseguridade laboral en industrias como as estabelecidas en Galiza: Megasa, Alcoa, Celsa, Ferroatlántica e SLG Carbón”.

Demanda a deputada do BNG que Industria proceda á aprobación dunha tarifa industrial estábel, “algo que existe en países da UE con fama de avanzados como Alemaña ou Franza”.

É unha rémora para as industrias
Rosana Pérez subliña que o BNG sempre se opuxo a este tipo de mecanismos “perversos para a nosa industria”. Critica o sistema de subasta que non da seguridade á hora de planificar o futuro empresarial. “Pedimos en numerosas ocasións que o Goberno retirase este modelo”. Pón de manifesto que o descontento medrou entre as industrias “tanto pola inestabilidade que xenera como por fomentar a competencia desleal xa que cada empresa ten uns custes de produción”.

Nese sentido, alude ao caso de Alcoa, adicada ao aluminio e con factorías en San Cibrao e A Coruña, e en Avilés. “Actualmente compite nun mercado onde están á alza outros minerais como o zinc ou o aceiro. A produción de aluminio precisa dun maior consumo eléctrico que a de zinc ou a de aceiro. Polo tanto, o custe de produción é máis alto e non está adaptado ás necesidades de produción de cada industria”.

De aí a proposta do BNG dunha tarifa industrial estábel. E aínda que “é verdade que Alcoa xoga un duplo xogo, ameazando a cada pouco con pechar as súas tres plantas en base aos seus propios intereses, hai que saber distinguir e separar cada cousa e ver que o sistema de interrumpibilidade é unha rémora para calquera industria”.

Non obvia o BNG a súa histórica demanda para que se modifique o sistema eléctrico e se contemple a condición de territorios excedentarios na produción de enerxía eléctrica, como é o caso de Galiza, “compensándolles por asumir os altos custes sociais, económicos e medioambientais que conleva a produción enerxética, e permitíndolles ter unha tarifa eléctrica propia con prezos máis baixos”.

Destaca Rosana Pérez que o feito de ser Galiza excedentaria en enerxía non lle conleva beneficio algún. “O 40% da produción eléctrica de Galiza destínase á exportación, pero os seus habitantes ou as súas empresas non se benefician de nada”.

A deputada do BNG critica que o Goberno argumente sempre razóns de solidariedade territorial para se negar á tarifa eléctrica para Galiza. “Pero só practica a solidariedade nun sentido. Non hai solidariedade co que produce a enerxía e sofre os custes de xerala”.