Fernando Lacaci.- Hoxe, 30 de outubro, é o día do ensino; e o conselleiro de educación, nunha colaboración nun xornal, lémbranos que é unha xornada no que toda a sociedade bota unha ollada ao seu redor, revisa e renova o compromiso coa instrución e coa formación; pero realmente só é unha xornada non lectiva, onde ninguén olla para ningures porque as canles de revisión e renovación están pechadas, como os colexios nun día como hoxe, no que por ser a súa festa deberían estar abertos a toda a comunidade educativa para utilizalos como lugar de reflexión, debate e traballo sobre o ensino que queremos, e sobre o ensino que estamos facendo.
As familias, que somos certamente o principal axente formativo, non queremos confiar a ninguén o noso ser máis querido e marchar de alí mentres o forman ou instrúen, o que desexariamos facer é participar na formación dese ser e de todos os demais, porque somos representantes e parte da sociedade toda, e estar presentes na vida educativa como o piar fundamental que somos e que reivindicamos ser.
Pero esa presenza na vida educativa non é unha simple declaración de intencións, fágase unha vez ao ano ou constantemente; ten que estar soportada nunha vocación de colaboración, de diálogo, de información mutua, de intencionalidade de camiñar conxuntamente e de crear accións de futuro que sexan froito desa participación; ten que estar elaborada para poder afirmarse, ter canles abertas e fluídas, espazos de compromiso e de encontro, pero tamén espazos formais de desenvolvemento, de organización sistemática do traballo en común. A participación non pode ser un brinde ao sol que se lance de cando en vez. Ten que estar estruturada e traballada, ten que ser querida e regulada como un dereito positivo que a todos convén, sobre todo ao futuro da sociedade.
E non se pode, dende os actuais responsables da administración educativa, facer unha constante referencia á participación, cando veñen de eliminar case toda a capacidade real dos Consellos Escolares, único órgano onde as familias estamos presentes na vida cotiá dos centros escolares e nos que antes tomábanse decisións; cando veñen de modificar a elección da dirección dos centros escolares para poder nomealos en contra da opinión de profesorado e familias; cando a participación que nos reservan ás familias nos órganos autonómicos, como o Consello da convivencia, ou mesmo o Consello Escolar de Galicia, contase por porcentaxes ínfimas en relación á presenza que teñen sempre os representantes políticos, nin tan sequera os técnicos, da administración educativa; cando o partido que actualmente goberna Galicia ten esquecidos, alí onde goberna, aos consellos escolares municipais aos que nin tan sequera convoca, nin moito menos escoita; ou cando simplemente se negan a recibir aos representantes das familias, ou a iniciar mesas de traballo nos moitos temas nos que a participación das familias debería ser obrigatoria.
E tampouco se pode dicir que a inclusión da diversidade xa forma parte do cotián, do ordinario, cando temos unha notoria falta de profesionais de apoio en todos os centros educativos, cando o principal labor deste goberno foi laminar os cadros de profesorado impedindo precisamente a atención a esa diversidade que din que non está en discusión. A diversidade certamente non está en discusión, nin a súa existencia nin o seu tratamento, nin a consideración da necesidade de atención, e tampouco está en discusión, porque toda a sociedade o coñece, que este goberno traballou restando nesa atención, impedindo a integración, negando o dereito –que se materializa en medios, non doutra maneira- a que os diversos, que somos todos e todas, sexan tratados co mimo, a dedicación e a profesionalidade que precisan para sumar valores á sociedade toda, para que sexan unha riqueza para si propios e para o grupo no que se integran.
Non se pode traballar tanto para esnaquizar o ensino público e logo dicir que temos un día de festa e alegría no que reflexionamos. Pois a iso invitamos ao conselleiro, a reflexionar sobre a política educativa destes últimos anos, e a facelo tamén contando con quen realmente somos o grupo máis importante do ensino público: as familias, a sociedade que conforma este noso País.
Fernando Lacaci, vicepresidente de ANPAS Galegas.
Este luns, 14 de setembro, visitaron Mondoñedo, a Praia das Catedrais e Santa Cruz. A viaxe evocou as lecturas de Cunqueiro e as súas Crónicas do sochantre, nun percorrido que incluíu a catedral mindoniense e o barrio dos Muíños, ademais da emblemática praia de Augas Santas. Pola tarde participaron nunha exhibición de billarda grazas á estimable colaboración dos billardeiros da comarca. O martes partirán de regreso a Loktudi.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Este luns, 14 de setembro, deu comezo un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
A programación arrancará de 13:00 a 15:00 horas cos pinchos de benvida e unha sesión vermú a cargo do DJ Peabody. A continuación, de 15:00 a 17:00 horas, terá lugar a comida na Finca San Antonio, cun menú composto por salpicón de rape e langostinos, codillo con patacas, pan, postre, café, chupito e bebida incluída. Os tickets teñen un prezo de 40 euros e poden adquirirse en O Rincón, Confitería Alianza, Comercial Anjor e Perruquería Oriola; os menores de 5 anos asistirán de balde e os de 6 a 10 anos contan cun desconto do 50 %. Xa a partires das 18.30 horas haberá sesión de música con Toxo Guayaba.
