Burela, 9 de outubro de 2015. O alcalde, Alfredo Llano, subliña que a construción da nova escola infantil é unha competencia impropia para o Concello e reitera a súa intención de anular o convenio subscrito coa Xunta por parte do anterior equipo de goberno. Llano engade que a construción desta infraestrutura se encarece aínda máis porque hai obras que é necesario acometer e que non ían no proxecto inicial.
O rexedor contou que estivo estes días co encargado de obras da escola infantil que se está construíndo en Burela, “da cal nosoutros xa dixemos cando estábamos na oposición no anterior mandato que non nos parecía correcto que o Concello asinase un convenio coa Consellería de Benestar para a construción dunha escola infantil dado que é unha competencia impropia, polo que o Concello non ten que facer esa obra porque condiciona moitísimo o orzamento municipal”.
Alfredo Llano dixo que “ademais esta gardería, que estivemos vendo co encargado das obras, vexo que aínda hai moitas cousas que non se contemplaron no proxecto inicial, hai moita obra que vai ser complementaria, o que vai encarecer bastante o que estaba previsto. Hai que facer unha serie de traballos que de momento non están contemplados no orzamento. Por tanto no convenio estaba fixado que o Concello tiña que aportar un 40 por cen de todas as obras e despois facerse cargo do mantemento da gardería. Iso é unha barbaridade, porque o Concello xa tivo que aportar o solar onde se está construíndo, o que supuxo uns 90.000 euros, e agora o 40 por cento das obras que estaban previstas, pero neste momentos vemos hai que facer outras a maiores que daquela non estaban contempladas. Porque, por exemplo, hai unhas canalizacións de augas pluviais e residuais que aínda hai que levar á rede; e iso tamén vai encarecer bastante o seu custe”.
O alcalde sinalou que “estiveron traballando durante todo este tempo sen luz de obra, polo cal os encargados da construción tiveron que levar un xerador de electricidade, o que encareceu unha barbaridade todo o proceso de construción desta gardería. Non entendo como nun núcleo urbano os anteriores gobernantes do Concello non se moveron para levar luz de obra á gardería e que non tiveran que ter un xerador alí”.
Llano asegurou que “ademais hai que facer unha serie de arranxos que están contemplados xa no interior, que tamén van ser obras complementarias e polo tanto hai que dotalas de presuposto. Hai unha cuestión que a min paréceme moi importante: é que a zona que debe ser axardinada para destinar a espazo de recreo para os nenos que vaian alí aínda está sen preparar. Tamén, como consecuencia, haberá que artellar e pagar unha serie de acondicionamentos que van seguir encarecendo a achega do Concello para a construción da gardería, que é unha competencia impropia”.
O rexedor burelés lembrou que “xa o dixen daquela e dígoo tamén agora, que son alcalde: vou solicitar a anulación dese convenio que se firmou naquel momento. E vamos facelo argumentando que cando se fixo a lei de racionalización dicía o Goberno Central que eses convenios que correspondían a competencias impropias había que anulalos. Polo tanto nós imos aproveitar iso e argumentar que non podemos seguir con ese convenio, dado que é unha cuestión que é moi desfavorable agora mesmo para o Concello de Burela”.
Alfredo Llano di estar decepcionado “por como se levaron a cabo as obras da gardería, que é moi difícil que se abra no tempo que estaba previsto, pois tíñamos contemplado que fose en xaneiro ou febreiro. Pero tal e como se atopa o estado das obras, o que queda por facer, os complementos, etcétera, non creo que sexa posible abrila durante este curso. Así que posiblemente haberá que ter todo preparado para o curso que vén. O motivo é a desidia e esa forma de facer as cousas e a pouca vixilancia que houbo desde o anterior equipo de goberno”.