A Área de Cultura da Deputación asina un convenio de apoio ao Festival de Pardiñas

Lugo, 13 de novembro de 2015.- A área de Cultura da Deputación de Lugo, a través do seu deputado delegado, asinou un convenio coa Asociación Cultural Xermolos para apoiar a celebración do Festival de Pardiñas. O responsable da área de Cultura e Turismo da institución provincial, o nacionalista Xosé Ferreiro, sinalou que “estas son as cousas que nos teñen que ocupar e preocupar, dar apoio ao tecido asociativo que traballa por manter viva a cultura nos concellos”.

Ferreiro destacou que “o Festival de Pardiñas é unha das citas indiscutibles do verán galego” e sinalou que “o noso compromiso co tecido asociativo segue adiante”. O Festival de Pardiñas é un dos eventos que organiza, ao longo do ano, a Asociación Cultural Xermolos e neste ano 2015 chegou á súa 36 edición “o que da conta da seriedade e compromiso de Xermolos á hora de manter a celebración deste encontro que eles mesmos nomearon, acertadamente, como Feira e Festa da música e da Arte”.

O deputado de Cultura anunciou que “nos vindeiros días afrontaremos o deseño dos orzamentos do ano vindeiro para dar, como sempre fixemos, o apoio necesario á cultura, o deporte, e a actividade de colectivos e concellos que van ter as portas abertas nas áreas que os nacionalistas gobernamos na Deputación de Lugo”.