Aberto ata o 23 de novembro o prazo para participar no certame infantil de postais de Nadal organizado polo Concello de Cervo

Cervo, 13 de novembro de 2015. O Concello de Cervo convoca un ano máis o certame de postais de Nadal, que este ano chega á súa 16ª edición, dirixido a nenos e nenas alumnos de Infantil e Primaria do municipio. Os traballos poden achegaranse á Casa do Mar de San Cibrao ou á Casa do Concello de Cervo ata o 23 de novembro e terán que presentar unha temática de Nadal, con técnica libre en cartolina tamaño folio.

Haberá tres modalidades en función da idade dos participantes: de 3 a 5 anos, de 6 a 9 e de 10 a 12. Entre os tres finalistas o Concello escollerá a que felicite o Nadal oficialmente a outros concellos e institucións, sempre e cando cumpra as condicións para unha boa reprodución na imprenta. O fallo do xurado farase público o día 30 este mes.

A concelleira de Educación, Cultura e Xuventude, Dolores García Caramés, espera que esta actividade “anime aos nenos e nenas a desenvolver a súa imaxinación e creatividade. O Nadal é unha época que lles gusta moito e esa ilusión plásmana moi ben nas súas postais. Tamén teñen unha motivación máis, que é a posibilidade de que a súa postal sexa a que o Concello utilice para felicitar o Nadal. É unha tradición no Concello que ten moita acollida. Todos os nenos reciben un agasallo por participar, ademais dos premiados”.