O alcalde e a concelleira de Cultura mantiveron a primeira toma de contacto con interesados en integrarse na área de artesanía que o Concello creará en Sargadelos

Cervo, 17 de novembro de 2015.- O alcalde de Cervo, Alfonso Villares, e a concelleira de Cultura, Dolores García, mantiveron este martes a primeira toma de contacto coa algúns dos interesados en integrarse na área de artesanía que o Concello creará no conxunto histórico artístico de Sargadelos. O rexedor anunciou que a oferta estenderase a todos os artesáns de Galicia.

Alfonso Villares explicou: “hoxe tivemos a primeira toma de contacto con algúns daqueles artesáns aos que lles diriximos unha carta; en total foron 21 do ámbito da Mariña cos que nos comunicamos e puxéronse en contacto con nós unha serie deles que xa mostraron o seu interese polo proxecto que desde o Concello de Cervo queremos levar adiante. Foi unha primeira toma de contacto na que tamén se lles expuxo cales son os locais que queremos acondicionar. Temos dúas localizacións distintas dentro do propio conxunto histórico artístico de Sargadelos e en función do número de artesáns que estean interesados en situar o seu obradoiro neste complexo se utilizarán máis ou menos”.

O alcalde anunciou que “o segundo paso que vamos facer desde o Concello de Cervo é estender esta oferta ao ámbito autonómico, a todos os artesáns de Galicia, aos que lles explicaremos, igual que fixemos cos artesáns locais, cales son as pretensións do Concello de Cervo, que non son outras que dinamizar o conxunto histórico artístico de Sargadelos; e facelo ademais coa artesanía, con aquelas persoas que traballan coas súas mans, do mesmo xeito que se facía tamén en certa maneira en Sargadelos hai xa máis de 200 anos. É unha historia que ten o conxunto histórico artístico de Sargadelos, que temos no concello de Cervo, e eu creo que en si xa é un efecto chamada para multitude de xente non soamente de Galicia senón tamén de fóra dela, que acoden cara a este aceno de identidade que ten o concello de Cervo”.