O BNG critica á Xunta e ao Concello na xestión dos comedores escolares de Burela

Burela, 12 de novembro de 2015.- O BNG criticou a xestión dos comedores escolares por parte da Xunta de Galiza, ao primar o abaratamento económico por riba da calidade do servizo. O portavoz municipal do BNG, Mario Pillado, sinalou que “se trata dunha das múltiples consecuencia dos recortes que está acometendo o goberno galego sobre os servizos básicos”. A política de austeridade posta en marcha polo PP está a xerar máis desigualdade e unha perda xeralizada na calidade dos servizos públicos que tamén afectan aos veciños e veciñas de Burela e aos nosos nenos e nenas. Agora veñen constatarse as consecuencias de adxudicar a calquera prezo a alimentación dos nosos escolares a unha empresa de Málaga.

Mario Pillado pide explicacións ao alcalde e demanda un servizo de calidade e que se manteñan os postos de traballo
Pillado tamén foi crítico co acalde de Burela, ao que cuestionou a súa escasa capacidade negociadora en relación ás necesidades dos comedores escolares do noso Concello. En palabras do Pillado, “o Sr. Llano non foi quen de dar unha solución e garantir a estabilidade das traballadoras dos comedores, que foron subrogadas á empresa adxudicataria no comezo do curso escolar”. Os nacionalistas piden ao alcalde que aclara que vai pasar coas traballadoras do colexio Vista Alegre e que solucións vai aportar o Concello neste asunto.

Para o BNG, os comedores escolares deben prestar un servizo de calidade, posto que se trata da alimentación dos nosos nenos e nenas e debe actuarse coa máxima celeridade e o máximo rigor. O BNG aposta por primar a calidade destes servizos, atendendo a criterios de salubridade e potenciando o emprego público e o comercio local na medida do posible. Pillado sinalou que “é unha boa forma de xerar emprego na nosa vila e garantir a calidade dos menús escolares”.