A Vicepresidencia da Deputación de Lugo presenta un Plan de apoio para asociacións lucenses, resultado do proxecto piloto “LoCalidade”

Lugo, 10 de decembro de 2015.- O Vicepresidente da Deputación de Lugo, o nacionalista Antonio Veiga, xunto coas alcaldesas de Guitiriz e Mondoñedo, Regina Polin e Elena Candia, e Manuel Varela, alcalde de Chantada, presentaron no Salón de Actos da sede da institución provincial os resultados do proxecto “LoCalidade”, proxecto piloto para a dinamización do medio rural a través das asociacións locais.

Esta iniciativa, posta en marcha na primavera do 2015, parte “da comprensión do medio rural como un espazo de oportunidades e posibilidades, das que xeralmente se fai un escaso aproveitamento” indicou Antonio Veiga. ‘LoCalidade’ naceu coa pretensión de impulsar o desenvolvemento local dende dentro xa que “a pedra angular deste proxecto é o empoderamento das asociacións e outros colectivos veciñais, entendidos como recursos endóxenos con capacidade para mudar a dinamización do territorio” abondou o Vicepresidente da Deputación.

Veiga explicou as diferentes fases nas que se baseou este proxecto, que permitiron obter unha radiografía da estrutura social, un estudo sobre o coñecemento da percepción cidadá a respecto da situación do tecido asociativo e da oferta sociocultural e deportiva en cada localidade, así como a creación dun catálogo de recursos e un mapa do tecido asociativo. “Todos estes documentos, xunto co ‘Plan de Apoio Asociativo’, produto central deste proxecto, foron elaborados coa metodoloxía piar durante todo o proceso: a participación social”, sinalou Antonio Veiga.

A participación cidadá como piar fundamental do proxecto

Tal e como indicou o Vicepresidente da Deputación de Lugo, “só falando directamente coa xente se coñece de primeira man as súas demandas”. Isto, xunto co apoio do equipo técnico encargado da execución deste proxecto, “permitiu detectar as necesidades do asociacionismo lucense para poder traballar no camiño da optimización do seu funcionamento” salientou Veiga.

Antonio Veiga indicou que “a base deste proxecto foi a participación cidadá. Deste xeito, sucedéronse un total de 42 entrevistas e mesas de traballo ás que foron convocadas todas as asociacións de cada un dos concellos seleccionados para realizar este estudo: Chantada, Guitiriz e Mondoñedo. Participaron no mesmo un total de 82 entidades que puxeron sobre a mesa as demandas e problemáticas do tecido asociativo nunha provincia como a nosa”, dixo.

Para o nacionalista, este tipo de proxectos xeran unha comunicación coas entidades sociais nunha dobre dirección, “pois achegan a institución á cidadanía, e orientan a esta na toma de decisións, dado que se dispón da oportunidade de actuar en función da demanda social e se racionaliza o gasto público”, dixo.

O Vicepresidente da Deputación de Lugo concluíu que “a participación cidadá na vida política debe ser realmente directa e activa, e é con este tipo de iniciativas que se camiña cara a a mellora da calidade do sistema democrático”. E, apuntou, “desde a Vicepresidencia da Deputación de Lugo témolo claro e así seguiremos a traballar, afondando no contacto directo co tecido asociativo de base, porque cremos na organización da cidadanía como un medio para conseguir grandes cousas”.