Barreiro: “Agora créase emprego, o que permite destinar máis recursos ao elemento vertebrador da sociedade, as persoas”

Lugo, 10 de decembro de 2015.- O portavoz do Grupo Parlamentario Popular no Senado e presidente do PP de Lugo, José Manuel Barreiro asegurou este xoves que a principal preocupación do Partido Popular son as persoas e, polo tanto, facer políticas que garantan que temos os mellores servizos públicos para atender as necesidades de todos. “Agora créase emprego, o que permite destinar máis recursos ao elemento vertebrador da sociedade, as persoas, prestando atención ao seu benestar e protexendo aos máis vulnerables”, explicou Barreiro.

O líder dos populares en Lugo fixo estas declaracións en senllos actos con afiliados en Ribadeo e Trabada, nos que estivo acompañado polo Vicepresidente da Xunta, Alfonso Rueda. O portavoz popular no Senado subliñou que “a mellor política social que existe é a creación de emprego porque cando hai máis xente traballando, máis persoas poden desenvolver os seus proxectos de futuro e hai máis recursos para financiar os servizos públicos”.

José Manuel Barreiro sinalou que por iso son tan importantes as medidas económicas implementadas por Mariano Rajoy “que conseguiron iniciar o camiño da recuperación, garantir as pensións e mellorar a atención a dependentes”. Neste sentido, Barreiro destacou os máis de 16.000 millóns destinados ao Plan Integral de Apoio á Familia ou o incremento de máis dun 6% no orzamento para a loita contra a violencia de xénero.

Exención do IRPF
“Cremos que a creación de emprego é o camiño acertado e está dando resultados, por iso imos continuar adoptando todas as medidas posibles para xerar postos de traballo”, asegurou o candidato popular ao Senado por Lugo. Destacou que a próxima lexislatura será máis fácil crear emprego estable e para incentivalo o PP bonificará con 500 euros durante catro anos a creación de contratos indefinidos.

Ademais, José Manuel Barreiro recordou que co Partido Popular non terán que pagar IRPF durante o primeiro ano aqueles que atopen o seu primeiro emprego nin tampouco aqueles que queiran prolongar a súa vida laboral máis aló da idade de xubilación. “Só a experiencia e a estabilidade política que aporta o PP permitirán seguir avanzando na creación de emprego e o benestar das persoas”, matizou.

Apoio ao gasoducto
Na súa intervención Barreiro destacou que o PP sempre apoiou aos sectores estratéxicos da Mariña “porque sabemos que son imprescindibles para a reactivación económica”. Puxo como exemplo o apoio ao gasoducto, “unha infraestrutura moi importante para o sector industrial da comarca”.

O dirixente popular recordou que a obra é o resultado dun esforzo compartido pola Xunta de Galicia, Gas Natural Fenosa e Alcoa. Nela investíronse máis de 30M€ e garante o subministro a máis de 55.000 usuarios domésticos, comercios e industrias de sete concellos. Entre os seus usuarios inclúese Alcoa, principal motor económico e social da Mariña.

Visita ao Astillero Armón
Antes de visitar Ribadeo e Trabada, o presidente do PP de Lugo estivo no Astillero Armón, en Burela, outro dos alicerces económicos da comarca. O astillero foi fundado en 1992 e na actualidade pode albergar a construción simultanea de ata 6 buques de 30 metros de eslora. Barreiro afirmou que tanto o Goberno de Mariano Rajoy como o de Alberto Núñez Feijóo mostraron o seu “apoio rotundo” ao sector naval e insistiu en que se avanzará en novos proxectos para xerar máis carga de traballo a un sector “imprescindible para a dinamización da economía galega e en particular para a Mariña”.