Aprobado por unanimidade da corporación municipal a solicitude de declaración de festa de interese turístico nacional para a Feira do Bonito

Burela, 29 de xaneiro de 2016. Por unanimidade aprobouse no pleno deste xoves a solicitude de declaración de festa de interese turístico nacional para a Feira do Bonito. O alcalde, Alfredo Llano, agarda que serva de recoñecemento ao traballo e ao esforzo realizados pola asociación Ledicia, organizadora da festa, e tamén aos voluntarios que ano tras ano traballan nesta cita.

O rexedor dixo que “todos votamos a favor desa declaración porque consideramos que sería moi positivo para o noso concello. Hai que ter en conta que isto está fundamentado no traballo e no esforzo realizados pola asociación Ledicia, organizadora da festa, serviría para darlle importancia a todo isto. É un recoñecemento á labor deste colectivo e a todos os voluntarios que os apoian. O epicentro desta feira é Ledicia e a través desa declaración se faría ese recoñecemento tan merecido e servirá para dimensionar aínda máis a Feira do Bonito”.

O asunto referido á xestión do cemiterio municipal quedou enriba da mesa: “tiñamos solicitado unha serie de requisitos ao Concello de Cervo. Onte as dúas institucións mantivemos unha conversa e chegamos a un acordo para traballar xuntos na resolución deste problema. Tentaremos facelo o antes posible, de feito imos convocarnos para unha reunión nos próximos días e así comezar a buscar solucións a este asunto o antes posible e da mellor forma posible”. A Alfredo Llano parécelle ben “abordar este asunto entre os dous Concellos. É algo que igual xa teríamos que ter feito, pero nunca é tarde si a dita é boa”.

Mocións
No pleno celebrado eeste xoves debatéronse varias mocións: “unha delas presentada polo BNG sobre Rosalía de Castro e a súa figura. Nós o que facemos e faremos será apoiar a cultura galega e a literatura de Rosalía. Procuraremos organizar algo de cara ao 24 de febreiro, data na que se cumpren anos do nacemento de Rosalía. O BNG tamén levou ao pleno outra moción sobre as praias e o socorrismo. É algo no que xa estamos a traballar, non nos esquecemos. Nas praias estamos a actuar desde o outono, estamos pintando balados e tamén os servizos da Marosa. O que queremos facer é ter todo listo para a Semana Santa, aínda que este ano cae bastante cedo, pero si ven bo tempo é bo que as praias estean ordenadas e listas para acoller aos seus usuarios. No verán queremos ter como mínimo 10 socorristas para atender á demanda dos areais que teñen bandeira azul. Houbo unanimidade porque cae de caixón que hai que facer as cousas o mellor posible neste ámbito tamén”.

E seguiu a relatar: “logo había outra cuestión, como son as estradas nacionais ao seu paso por esta comarca. Todos os partidos, menos o PP que o fai un pouco menos, insistimos sempre neste sentido. A vía de alta capacidade entre San Cibrao e Ferrol, que está como parada, e tamén a autovía Barreiros-San Cibrao, que está sen proxecto e sen presuposto. É algo que se debe retomar o antes posible. Dicían os do PP que non hai suficiente presuposto, pero eu penso que o que non hai é suficiente atención e preferencia para facer estas obras. Noutros lugares como Monforte, Lalín ou Guntín fanse obras e aquí non. Nós seguiremos a reclamalas tanto desde o Concello como desde a Mancomunidade de Municipios da Mariña, debido ao peso que ten esta comarca”.

Homenaxe
Llano volveu referirse á homenaxe que Burela lle renderá ao Almirante Santiago Bolíbar o vindeiro 6 de febreiro ás 14 horas no restaurante Palacio de Cristal. O rexedor destacou “o traballo realizado pola Armada, que sempre estivo apoiando aos nosos barcos nas costeiras do bonito” e lembrou que “o prezo do xantar e do agasallo que lle faremos a Santiago Bolíbar é de 50 euros. Quero animar a todos os que queiran asistir a que retiren as súas tarxetas no Palacio de Cristal. Teñen aínda tempo para facelo ata o vindeiro xoves, 4 de febreiro”.