Fernando Suárez lémbralles aos propietarios de vivendas nos cascos históricos de Ribadeo e de Rinlo que este martes acaba o prazo para solicitar axudas para a súa posible rehabilitación

Ribadeo, 4 de xaneiro de 2016.- O prazo para solicitar subvencións destinadas á rehabilitación de vivendas nos cascos históricos de Ribadeo e Rinlo remata este martes, 5 de xaneiro. O alcalde de Ribadeo, Fernando Suárez, lembra aos propietarios interesados que poden optar a axudas de ata o 35% da obra. Por agora hai cinco solicitudes presentadas en Ribadeo e unha en Rinlo do total de 16 rehabilitacións que poden contar con estas subvencións.

O rexedor dixo que “sen ánimo de querer ser rayante neste tema, quero facer como este anuncio de televisión que está estes días de moda, que di permíteme que insista. Eu tamén quero facer o mesmo dirixíndome aos propietarios de vivendas tanto do casco vello de Ribadeo como de Rinlo. Hai uns días emitimos un bando onde anunciábamos que se asinara un novo convenio co Estado e coa Xunta que permite a posibilidade de amañar unha serie de vivendas para este ano 2016. Son concretamente 11 vivendas para Ribadeo e 5 para Rinlo. Fixemos aquel bando e non sei se polo Nadal, seguramente por despiste de moita xente por estas datas que estamos atravesando, pero o certo é que remata mañá o prazo para pedir as axudas e de Ribadeo só hai cinco solicitudes presentadas e de Rinlo unha”.

A Fernando Suárez parécelle unha mágoa que os propietarios interesados en rehabilitar os seus inmobles non lles saquen partido a estas subvencións: “entre hoxe e mañá eu quérolles lembrar honestamente ás persoas que teñan vivendas nestes dous conxuntos históricos e que queiran sometelas a unha actuación de rehabilitación, que é unha mágoa que non collan estas axudas, dado que teñen unhas subvencións máximas do 35% do orzamento da obra, cun límite de 11.000 euros por vivenda rehabilitada e que incluso hai bonificacións nas licencias de obra. Ademais, se os proxectos de obra son menores, poderán ser redactados pola propia Oficina Municipal de Rehabilitación. Polo tanto, se entre hoxe e mañá alguén se anima, debe acudir á Oficina de Rehabilitación, que está no Concello, e alí o informarán da documentación a traer. Se non o fai, sempre poderá rehabilitar a súa vivenda, pero será unha mágoa que non poida aproveitar estas axudas que tanto a Xunta como o Concello e o Ministerio poñemos á súa disposición. Sen ánimo de ser pesado, pero permítanme que insista e por favor non deixen pasar esta oportunidade”.