O Concello de Ribadeo reporá os 4 colectores do lixo que foron queimados na rúa Virxe do Camiño

Ribadeo, 18 de xaneiro de 2016. A madrugada deste luns rexistrou un acto vandálico na rúa Virxe do Camiño onde foron queimados catro colectores do lixo. O alcalde, Fernando Suárez, dixo que “fraco favor lle fan á colectividade esas persoas que se dedican a cometer estas bobadas”. O Concello reporá os recipientes danados.

O rexedor explicou que “esta pasada madrugada houbo un pequeno incendio nuns colectores da rúa Virxe do Camiño, onde de maneira moi eficaz os voluntarios de Protección Civil acudiron co camión de bombeiros e apagaron o lume”.

Suárez Barcia contou que “foron 4 os colectores que arderon. Que dicir? Desde logo os colectores non arden sos, se ninguén lles prende lume. Son destes actos vandálicos, que non sei o que perseguen nin que pretenden máis que amolar á colectividade, porque ese diñeiro sexa máis ou menos é diñeiro público e de todos”. E engadiu que “agora hai que mercar outros colectores para repoñer os afectados e reparar os cubrecolectores que están todos afectados. Fraco favor o que lle fan á colectividade aquelas persoas que non tendo nada que facer, fan esas bobadas”.