Balseiro: “Agora toca afrontar a segunda fase de revitalización do PP de Lugo co obxecto de dar resposta ás necesidades que ten a sociedade nestes momentos”

Lugo, 6 de marzo de 2016.- O secretario xeral do Partido Popular de Lugo, José Manuel Balseiro, presentou no transcurso do congreso provincial extraordinario o informe de xestión, que resume as liñas de actuación do partido dende a celebración do último conclave. Balseiro fixo balance e asegurou que “co esforzo e as achegas de todos hoxe dispoñemos dun partido capaz de afrontar o futuro con maior seguridade” e agora “débese afrontar a segunda fase da revitalización do PP de Lugo, co obxecto de dar resposta ás necesidades da sociedade nestes novos momentos”.

O secretario xeral dirixiuse ás candidatas populares, considerando que agora é o momento dos “novos tempos, fortalecer equipos, combinar con sabedoría experiencia e renovación”, ademais de, engadiu, “reflexionar sobre a necesidade de introducir cambios nas formas de facer políticas” e de impulsar “o maior proceso de apertura e participación de todos os que leva feito esta organización”. Así, considera que “temos que seguir pisando terreo, o PP non pode renunciar a estar ao pé da rúa, do terreo, falando coa xente e continuar co proceso de renovación e participación que iniciou Barreiro”. Ademais, “hoxe temos que preservar o espírito de equipo que fai forte ao Partido Popular e manter as ganas e a ilusión dun gran proxecto político capaz de incluír a todos, implicar a todos e ilusionar a todos”, conclúe.

Informe de xestión
No que refire ao balance da xestión promovida pola dirección saínte dende o mes de marzo de 2013 ata a actualidade, Balseiro asegurou que “foi un tempo de enorme dificultade, nos que as administracións e os cidadáns tiveron que realizar grandes esforzos”. Neste contexto, o PP de Lugo seguiu sendo a forza maioritaria da provincia, tal e como “se confirma en cada proceso electoral”. “Aprendemos dos erros que nos levaron a perder votantes, pero tamén asumimos a responsabilidade de manter e incrementar o respaldo dos cidadáns que de sempre ten caracterizado ao noso partido, e que nos confirmaron elección tras elección, na primeira forza política de Lugo”, analizou.

Nas eleccións autonómicas de 2012, “fomos a única provincia en acadar dous deputados por riba da da maioría absoluta, 9 dos 15 parlamentarios lucenses”, ademais de ser a primeira provincia en intención de voto de Galicia. Nas eleccións municipais o PP logrou a responsabilidade de goberno en 33 dos 67 concellos lucenses, e foi a primeira forza política na maioría deles, cun porcentaxe de votos no conxunto da provincia do 39%. Lugo foi a única provincia de Galicia na que o PP non perdeu deputados provinciais. En canto aos comicios xerais, o PP foi a forza máis votada en 61 dos 67 concellos que ten a provincia e melloráronse os resultados con respecto ás municipais.

300 novos afiliados
O Partido Popular de Lugo incrementou o número de afiliados. Balseiro matizou que “hai 300 afiliados novos, máis persoas que quixeron facer explícito o seu compromiso co noso partido nestes tres últimos anos. Gañamos a confianza de moitos, para seguir avanzando”.

A maiores, o secretario xeral tamén dixo que “temos que ser o partido máis sensible aos cambios que esta provincia experimenta” e, por iso, “iniciamos un proceso de renovación local e de reunións comarcais que pretendían achegarnos ás necesidades de cada concello, explicar a xestión de goberno e render contas”.

Neste senso, resumiu que “actuamos en tres ámbitos moi definidos”. O primeiro deles, “darlle músculo, organizando e renovando ao noso partido e a súa acción sectorial”, con 24 xuntas locais renovadas dende 2013 e novos foros de participación. O segundo, a coordinación da acción de goberno e dos grupos da oposición, reforzando a asistencia e información que reciben e que aínda pode ser ampliada grazas a oportunidade que ofrecen as novas tecnoloxías. E, en terceiro lugar, dispoñendo dunha nova sede provincial, totalmente equipada, “lugar de reunión e foro permanente de atención”, dixo.

Agradecementos
Na súa intervención, Balseiro tamén tivo palabras de agradecemento para José Manuel Barreiro, “quen seguirá sendo unha peza esencial para este partido, coa responsabilidade nacional” e quen, segundo o popular, “ten demostrado o seu compromiso co que significa a gran familia do PP”, o que se amosou a través da “súa entrega, coa xenerosidade e o acerto que sempre o caracteriza”.

O secretario xeral tamén fixo extensible o seu agradecemento a todos os que, “dun xeito calado pero constante”, fixeron posible co seu traballo “inesgotable e desinteresado” que o Partido Popular de Lugo “sexa a maior organización democrática da provincia”.