O PSdeG reclama no Congreso o arranxo da N-642 e da N-634 ao seu paso por Barreiros

Lugo, de marzo de 2016.- A Deputada luguesa do PSdeG-PSOE, Margarita Pérez Herraiz, e o Senador Ricardo Varela, anunciaron que os socialistas rexistraron unha Proposición non de Lei no Congreso dos Deputados para reclamar labores de mantemento na N-634 ao seu paso por Barreiros, e a N-642 para que sexa posible a súa utilización nas condicións mínimas que precisa a seguridade”.

A Deputada socialista explica que o tramo de Barreiros-San Cibrao da estrada N-642 soporta diariamente miles de coches cun pésimo estado do firme. Relata que esta infraestrutura é utilizada por centos de mariñáns para o seu desprazamento ao Hospital da Costa en Burela. Ademais sinala que é utilizada como transporte de mercancías, para os eucaliptos que levan a celulosa á localidade asturiana de Navia, ademais dos turistas que visitan esta zona da Mariña.

Pérez Herraiz advirte que o propio Ministerio de Fomento recoñeceu a necesidade dunha reparación integral desta vía, pero critica que “unicamente se realizaron algunhas melloras en 9.2 km”.

Ademais a N-634 que une a cornisa cantábrica con Santiago de Compostela, pasando pola provincia de Lugo, tamén esta en moi mal estado, especialmente, ao seu paso polo Concello de Barreiros. Lamentablemente estes mesmos dias houbo un grave accidente na A-8, ao seu paso por Ribadeo, no que faleceu unha persoa, por iso insiste a deputada “é fundamental mellorar a seguridade nos viais da comarca”, resumiu.