Villares, disposto a falar con outras administracións sobre a compra dos terreos para ampliar o Museo do Mar, pero recorda que a Corporación Municipal aprobou por unanimidade unha moción do BNG para que esa parcela fose adquirida pola Deputación

Cervo, 23 de marzo de 2016.- Ante as declaracións do delegado de Cultura da Deputación, o nacionalista Xosé Ferreiro, feitas públicas este mércores, o alcalde de Cervo, Alfonso Villares, manifestou que está disposto a falar con outras administracións sobre a compra dos terreos para ampliar o Museo do Mar, de San Cibrao. Pero o rexedor municipal recorda que a corporación cervense aprobou por unanimidade unha moción presentada polo BNG para esa parcela fora adquirida pola Deputación Provincial.

“Ante as declaracións de responsables do BNG na Deputación Provincial de Lugo para que nos sentemos a Deputación, o Concello de Cervo e a Xunta para falar da adquisición dos terreos colidantes ao Museo do Mar, digo o que xa comentei hai un par de meses: estamos dispostos a sentarnos a falar, só faltaría, porque eu creo que é importante que entre as distintas administracións sempre se fale e se poñan de acordo á hora de intentar traballar para o ben común; e neste caso o ben común é que eses terreos sexan adquiridos para ampliar o Museo do Mar. Pero eu xa daquela comentei que primeiramente téñense que poñer de acordo o BNG de Cervo e o da provincia, porque quero recordar que a proposta do BNG de Cervo, xa hai uns anos, aprobouse unha moción por todos os grupos da corporación municipal para pedirlle expresamente á Deputación Provincial de Lugo que adquirira eses terreos”, explicou Alfonso Villares.

E o alcalde de Cervo engadiu: “por iso lles digo aos representantes do BNG na provincia que falen cos seus compañeiros de Cervo e se realmente van cambiar a postura ou a proposta que fixeron hai uns anos que o manifesten publicamente. E unha vez que entre eles se aclaren nosoutros claro que estamos dispostos a sentarnos para falar, só faltaría”.