Balseiro replica a José Ramón Val e lembra que o PSOE votou en contra de medidas a favor dos traballadores de conserva

A Mariña, 29 de abril de 2016.- O voceiro do Mar do Grupo Popular, Jose Manuel Balseiro, dixo que o seu homólogo socialista Jose Ramón Val “segue absolutamente perdido” ata o punto de que este venres, lonxe de rectificar, vexe incapaz de recoñecer e pedir desculpas polo “flagrante erro” que cometeu cando no último Pleno do Parlamento galego votou en contra da iniciativa do PPdeG para impulsar o plan estratéxico da conserva.

Balseiro lembra que, cando o PSOE rexeitou este plan de apoio tamén estaba votando en contra das medidas previstas nel –das que quizá Jose Ramón Val aínda non se decatou- pero que inclúen, entre outras, a posta en marcha dunha serie de axudas directas dirixidas a consolidar o emprego neste sector, a apostar pola contratación indefinida, e tamén de iniciativas de fomento da formación, pactadas con empresas e sindicatos.

Apoio fronte a pasividade
O deputado popular insiste en que, se ben isto “non será a panacea”, fronte a todos os problemas que afectan ao sector “e que sufrimos, en primeira persoa na Mariña, pola situación da factoría de Conservas Alonso de Celeiro, é innegable que será moito mellor destinar axudas e inversións a este sector que non facelo, como propón o PSOE”.

O deputado popular lamenta que, obsesionado por non coincidir co PP, o seu homólogo socialista sexa “prisioneiro da esquerda radical o dos nacionalistas” o que lle leva a votar en contra deste tipo de iniciativas obxectivamente beneficiosas para os profesionais do mar e que, por sorte, si sairán adiante e poderán executarse grazas ao voto favorable do Partido Popular, con maioría absoluta na Cámara e do compromiso do Goberno galego.