A Área de Cultura destina 60.000 euros a poñer en marcha a segunda edición do Circuíto de Teatro Profesional da Provincia de Lugo

Lugo, 6 de maio do 2016. A Xunta de Goberno da Deputación de Lugo aprobou este venres as bases para arrincar a segunda edición do Circuíto de Teatro Profesional da provincia de Lugo. O responsable de Cultura na Deputación de Lugo,o nacionalista Xosé Ferreiro, presentou estas bases na tradicional rolda de prensa posterior á Xunta de Goberno.

Ferreiro avanzou que as bases do Circuíto de Teatro Profesional da provincia de Lugo sairán publicadas na vindeiras semana no BOP, e sinalou que “A aposta da Área de Cultura polas e polos profesionais do teatro na nosa provincia é clara. Cremos que é un paso adiante que debemos dar convencidos de que temos talento a esgalla, que as producións das comapañías lucenses deben ser coñecidas polo público e, tamén, convencidos de que a cultura pode e debe ser fonte de xeración de emprego digno” dixo.

O Circuíto de Teatro Profesional da provincia de Lugo contará cun orzamento de 60.000 € e desenvolverase desde o 1 de xullo ata o 30 de novembro. No mesmo poderán participar todos os grupos de teatro profesional con residencia na provincia de Lugo, que estean legalmente constituídos baixo a forma de empresa, comunidades de bens ou de asociacións culturais e que realicen tanto os ensaios como a súa actividade habitual na provincia de Lugo. Poderán inscribirse con pezas que non se estean representar xa nos circuítos doutras Deputación e deberán respectar sempre os convenios colectivos vixentes no que afecta ás contratacións.

Ferreiro explicou que “tras a experiencia piloto do ano pasado, nesta nova edición corríxense e mellóranse aspectos do Circuíto que se detectaron como necesarios”. Así, o circuíto non levará o nome Buxiganga “dadas as confusións que se detectaron no pasado ano con respecto ao circuíto afeccionado” informou Ferreiro. Así mesmo, serán os Concellos quen poderán inscribirse no Circuíto para programar “incentivando así a actividade cultural nos Concellos da nosa provincia”, podendo solicitar varias funcións e instándoos a “introducir as funcións do Circuíto Profesional de Teatro en ciclos de teatro máis amplos, levalas aos centros de ensino, centros sociais etc,” dixo.

O Delegado de Cultura informou tamén da modificación da achega da Área de Cultura da Deputación a este Circuíto, “que pasa a ser do 80% fronte ao 20% ao que terán que facer fronte os Concellos. Con isto buscamos que a cuestión económica non sexa unha excusa para non participar no Circuíto, asumindo a Área de Cultura a meirande parte do caché de cada función”, dixo Ferreiro.

Ao igual que os grupos e compañías, os concellos tamén terán un prazo de 20 días naturais a partir da publicación das bases no BOP para presentar as súas respectivas solicitudes.

Aqueles responsables de concellos, grupos ou compañías interesados en recibir máis información poden obtela chamando ao 982 260 180, escribindo ao enderezo electrónico ana.culturaedeporte@deputacionlugo.org ou acudindo directamente ás oficinas da Área de Cultura da Deputación no Pazo de San Marcos.