Os traballadores de Mayco seguirán mobilizánse ante “a falta de información sobre o mantemento do contrato con Alcoa”

Os traballadores da Empresa Mayco (Grupo Bidueiros) Auxiliares de ALCOA no departamento de Fundición, participaban este xoves 26 de maio nunha manifestación que percorría a Estrada de Acceso a Alcoa e a Estrada de Laxe – Morás entre as 06.00 e as 09.00 horas -á que se engadía un paro entre as 08.00 e as 09.00 horas.

O delegado de persoal, Miguel Díaz, explica que “seguimos sen saber se Mayco manterá o contrato de fundición con Alcoa”. Nese sentido, “seguiremos coas manifestacións mentres non se reúna a empresa con nós e paros en forma de folga indefinida durante o vindeiro mes; xa que continúa a falta de comunicación por parte da dirección da empresa Mayco”.

Os traballadores solicitan “información para saber a que aternos. Cun empresario tan mozo non concibimos que actúe como se estivésemos no século XIX, impoñendo unilateralmente as súas condicións cando sabe que está rexido por unhas normas coma a E.T., L.P.R.L, etc”.

Así mesmo, o delegado de persoal apuntaba que “estamos a recibir coaccións por parte dun encargado e da dirección da empresa dirixidas aos traballadores que exercemos o dereito á folga”.

Con todo, Díaz agradece “a xenerosidade e paciencia de tódolos traballadores afectados pola entrega de octavillas durante esta semana e pola manifestación do día de hoxe” igual que “as mostras de apoio recibidas polo comité de empresa de Alcoa e a súa presenza nestas mobilizacións”.

Incidentes
A manifestación transcorría con normalidade excepto polo intento de atropelo, que non aconteceu pola rapidez dos traballadores en apartarse, ao acceder un vehículo á cabeza da manifestación invadindo o carril contrario nunha curva.