Alfredo Llano recolleu as seis bandeiras azuis outorgadas aos areais de A Marosa, O Portelo e Ril, ao barco museo, a aula ambiental Gaia e á ruta doo litoral burelés

Burela, 1 de xuño de 2016.- O alcalde, Alfredo Llano, acompañado dos concelleiros de Medio Ambiente, Noelia María Ben, e de Protección Civil, Ramón Vázquez, asistiu este mércores en Oleiros ao acto de entrega das bandeiras azuis. Burela recibiu seis, tres para os areais de A Marosa, O Portelo e Ril, e outras tres para o Barco Museo, a Aula Ambiental Gaia e a ruta do litoral burelés.

O rexedor e tamén presidente da Mancomunidade de Municipios da Mariña sinalou que “todos os concellos costeiros teñen a súa bandeira azul, como mínimo unha e hai outros concellos que teñen bastantes máis. Iso quere dicir que polo menos na nosa comarca coidase o medio e procúrase un bo servizo para os areais facendo sempre a mellor maneira de atraer xente para a zona”.

Alfredo Llano engadiu que “como presidente da Mancomunidade teño que dicir que estamos contentos de que todo o mundo teña unha representación de bandeiras azuis en todos os concellos costeiros”.

O alcalde de Burela salientou “con respecto a Burela hai que dicir que a Concellería de Medio Ambiente está funcionando ben. Iso significa que dalgunha maneira aumentamos as posibilidades de bandeiras azuis. Temos este ano tres nos areais máis outras tres que son de recoñecemento como é o Barco Museo, a Aula Medioambiental Gaia e o sendeiro azul para a ruta do litoral burelés”.

Llano asegurou que “en Burela estamos preocupados polo medio ambiente e queremos facer algo que realmente chame a atención e motive á xente a facer as cousas mellor e a estar máis comprometidos co noso medio”.

Finalmente o rexedor burelés declarou que “imos procurar en primeiro lugar tratar de contratar aos socorristas, unha vez que estean contratados izaremos as bandeiras. Posiblemente o fagamos nos areais a finais do mes de xuño”.