Arias alude á Ruta dos Faros como reclamo turístico que contribúe a visibilizar e poñer en valor os recursos naturais da Mariña

Lugo, 11 de xuño de 2016.- A delegada territorial da Xunta en Lugo, Raquel Arias, percorreu na tarde deste sábado o traxecto que une O Barqueiro (Mañón) con Reinante (Barreiros) a bordo do tren turístico da Ruta dos Faros, que iniciou hoxe a primeira viaxe da tempada de verán.

A Ruta dos Faros é un dos nove itinerarios enmarcados na cuarta edición do programa de trens turísticos Galicia a todo tren que promove Turismo de Galicia, en colaboración con Renfe e a Deputación de Ourense, e que percorrerá desde agora e cada sábado de xuño, xullo, agosto e setembro o traxecto entre Ferrol e Ribadeo, pasando polos concellos costeiros da provincia de Lugo.

Raquel Arias destacou que “o valor desta ruta como reclamo turístico para os miles de visitantes que chegan á nosa Comunidade cada verán, que poderán coñecer nun só día algúns dos enclaves naturais máis representativos da Mariña lucense, ao facilitárselle un acceso cómodo a algúns dos puntos máis illados da nosa costa”.

Trátase dun paquete moi completo que permitirá aos viaxeiros percorrer en tren o litoral norte de Galicia, realizando paradas e mesmo sendo trasladados en autobús a puntos de gran valor paisaxístico, entre eles a praia das Catedrais ou o entorno do Faro de Illa Pancha, en Ribadeo.

Por outra banda, “este itinerario é un produto que permite tanto xerar riqueza na comarca, porque incrementa o fluxo de visitantes e, consecuentemente, os clientes nos establecementos hostaleiros, como poñer en valor os recursos patrimoniais e naturais dos seus concellos ao representar tamén unha ferramenta de promoción e difusión turística”, explicou Arias.

A delegada da Xunta tamén lembrou a boa acollida que tivo a Ruta dos Faros o verán pasado, cando “o tren acadou unha ocupación do 86% e trasladou ao longo da costa norte de Galicia a máis de cincocentos viaxeiros”.

Turismo de Galicia impulsa este verán na provincia de Lugo catro rutas turísticas en tren. Ademais da dos Faros, figuran na oferta a Ruta do Viño da Ribeira Sacra, a Ruta do Viño de Valdeorras-Ribeira Sacra e a primeira edición da Ruta Termal e do Camiño do Norte a Santiago.

Nesta nova edición, o programa Galicia a todo tren incrementará a oferta global en 84 novas prazas, grazas a aos bos datos da tempada pasada, na que se obtivo unha ocupación do 87%, superando os 2.200 pasaxeiros.

Na provincia de Lugo, a Ruta do Viño da Ribeira Sacra foi a que rexistrou a maior ocupación, que foi do 100%, “o que demostra a gran demanda deste produto turístico e o crecente interese que espertan entre os viaxeiros os xeodestinos e o patrimonio histórico e natural da provincia de Lugo”, dixo Arias.