O alcalde e a concelleira de Cultura acompañaron aos rapaces dos colexios de infantil e primaria no remate do curso facendo entrega a todos eles do libro “Os Bolechas visitan Cervo”

Cervo, 21 de xuño de 2016.- O alcalde, Alfonso Villares, xunto á concelleira de Educación e Cultura, Dolores García Caramés, acompañaron aos rapaces dos dous colexios de Infantil e Primaria do concello, aos que fixeron entrega do libro Os Bolechas visitan Cervo.

Alfonso Villares comenta que “desprazámonos tanto a concelleira de Cultura como eu mesmo aos dous colexios de Infantil e Primaria que temos no concello, ao colexio de San Cibrao e ao de Cervo. Achegámonos para visitar aos rapaces aproveitando que se acaba o curso escolar e tamén darlles un regalo. Trátase dun libro que foi editado exclusivamente para o Concello de Cervo, que é da serie dos Bolechas, neste caso Os Bolechas visitan Cervo”.

O rexedor municipal subliña que “é unha forma de darlles este libro a todos eles para que aproveiten o verán e poidan darlle unha ollada a esa lectura. Un libro que tamén axuda a que os nosos nenos coñezan todo o noso concello, as nosas parroquias e aqueles sitios que son de máis renome dentro do concello de Cervo. É unha forma de despedir o curso escolar e de apoiar, como estamos a facer desde o Concello de Cervo, á educación no noso municipio”.