A concellaría de Limpeza Viaria pide colaboración para manter limpas as rúas durante o III Ribadeo Indiano

Ribadeo, 8 de xuño de 2016. A Concellaría de Limpeza Viaria pide colaboración para manter Ribadeo o máis limpo posible ao longo destes días de celebración da terceira festa indiana.

Jorge Díaz Freije manifesta que “o obxectivo principal é que todos e todas gocemos desta festa, que se vive na rúa, que acudamos aos espectáculos que hai programados… pero sen esquecernos de deixar os vasos no interior dos establecementos que visitemos e se son de plástico que os tiren nas papeleiras e nos contedores que encontrarán na rúa. E que fagan o mesmo cos papeis, bolsas, etc…”.

O edil nacionalista insiste en “pedir a máxima colaboración aos veciños e ás veciñas de Ribadeo, aos milleiros de persoas que nos visitarán ao longo destes tres días e tamén aos hostaleiros e comerciantes de Ribadeo. Entre todos podemos facelo”.

E engade: “o noso departamento traballará intensamente para que a nosa vila estea limpa ao longo desta fin de semana e ofreza a mellor imaxe a veciños e visitantes”.

Díaz Freije subliña que “o vindeiro de luns, 11 de xullo, pasaremos a recoller as follas das palmeiras que se están a empregar para decorar Ribadeo e os seus locais hostaleiros e comerciais. Tal e como xa informamos estes días establecemos diferentes puntos para que as deixen alí depositadas e durante esa xornada serán retiradas. Non queremos que as follas das palmeiras queden esquecidas durante días en calquera lugar da nosa vila”.