O Concello de Cervo investirá máis de 80.000 euros nas obras de mellora do saneamento en San Cibrao

Cervo, 13 de xullo de 2016. O Concello de Cervo presenta a aprobación no pleno extraordinario da corporación municipal que se celebrará este xoves dous investimentos que en total superan os 80.000 euros para obras de mellora nas infraestruturas de saneamento de San Cibrao.

O alcalde, Alfonso Villares, anunciou que “mañá vai ter lugar en Cervo un pleno extraordinario onde, entre outros puntos, imos levar dous asuntos que nós consideramos moi importantes, porque permítennos facer unha serie de investimentos no noso concello que van reverter naquelo que nós consideramos fundamental, como son os servizos básicos, neste caso trátase de investimentos no saneamento de San Cibrao”.

Alfonso Villares subliña que “van ir baixo a modalidade dun investimento financeiramente sostible. A normativa estatal desde hai uns anos impídenos aos concellos gastar máis do que poidamos, pero tamén nos posibilita nos casos como é o do Concello de Cervo, onde temos un remanente de tesourería positivo do exercicio anterior, destinar parte dese remanente a obras de investimentos financeiramente sostibles”.

A concelleira de Medio Ambiente no Concello de Cervo, Manuela Méndez, detalla que “parte deste diñeiro, en concreto 54.143,14 euros, va ir destinada á reparación do emisario da estación de bombeo de San Cibrao. Por outra parte, temos un investimento de 26.807,55 euros que vai ir destinado á reparación do equipo de trituración do tanque de tormentas, tamén no saneamento de San Ciprián, a carón da Casa do Mar. É unha obra que fixo hai pouco pero houbo problemas no seu momento coa Confederación Hidrográfica do Norte porque nos entregou as obras sen emisario e polo tanto estivo a maquinaria moito tempo sen funcionar, de aí que parte desa maquinaria agora mesmo haxa que reparala e renovala. Pero, sen darlle máis voltas ao asunto, hai que acometer estas obras e nós desde o goberno do Concello de Cervo seguimos a investir naquelas actuacións que nós consideramos que afectan aos servizos esenciais que temos que ter todos os cidadáns”.

E o alcalde rematou destacando que “estes investimentos son posibles debido a unha xestión que nós consideramos responsable e que levamos xa durante unha serie de anos facendo, tratando de gastar menos do que podemos. De aí, como dixemos onte, as contas xerais do ano 2015, onde todas as magnitudes económicas nos resultan positivas, son as que nos posibilitan que no día de hoxe poidamos destinar diñeiro, que son fondos propios do Concello de Cervo, que temos todos os veciños do municipio, para investimentos deste tipo”.