PSdeG-PSOE: “Ribadeo engalanado, pero abandonado”

Celebrado o Ribadeo Indiano, polo que queremos felicitar tanto a ACISA, pola súa brillante organización, coma ós veciños e veciñas, pola súa exemplar participación, toca pararse a pensar un pouco na situación do concello e se é posible felicitar ó equipo de goberno pola súa indubidable dedicación á festa cando teñen en total abandono a vila e as parroquias, incumprindo cas obrigas encomendadas pola veciñanza.

Sen desprezar a súa importancia para o Concello, parece que Ribadeo non é mais que As Catedrais, Os Indianos e a residencia da terceira idade: o resto está absolutamente desatendido polo alcalde e os seus concelleiros.
Poñamos só por exemplo a rúa de San Roque, na que se desenrolou parte da celebración: preciosa cas súas grinaldas e as súas bandeiras brancas, ben perigosa cas súas beirarrúas cheas de buratos, cas raíces das árbores querendo saír por entre as xuntas do pavimento, e cas irregularidades que estas provocan no terreo e que converten a rúa nunha pista de obstáculos… Cando se puxeron os adornos para os Indianos, habería que ter posto tamén uns carteis avisando ós viandantes de que, de camiñar polas beirarrúas, non esquecesen ir mirando para o chan.

Ribadeo ten moito traballo pendente para facer da vila e das parroquias un exemplo de mantemento e coidado, un traballo que ten que ser diario, de dedicación continuada, exclusiva, como pola que cobra o señor alcalde…
A mais dun ano da celebración das pasadas municipais e da formación do actual goberno do concello, os veciños e veciñas seguimos esperando a que cumpran co programa que defenderon para as eleccións e no que se recolle, por exemplo no punto 90: “Tanto nas vías públicas como nos edificios oficiais seguiremos mellorando a accesibilidade e a mobilidade para persoas con algún tipo de diversidade funcional”; no apartado 94, “Potenciaremos a vida económica e social das parroquias mantendo ao día as infraestruturas básicas (pistas, rede de camiños, limpeza de gabias, conservación do contorno dos ríos, locais sociais, etc.)”, ou no 102: “Seguiremos avanzando no saneamento das parroquias e as praias do concello”…

Sabemos que o señor alcalde e os señores e señoras concelleiras pisan as rúas de Ribadeo cada día e coñecen o estado das mesmas, do mobiliario urbano, dos parques e paseos,… Estamos seguros de que coñecen tamén o estado de absoluto abandono de pistas e camiños, gabias, contorno dos ríos, locais sociais, parques de nenos e maiores,… das parroquias. Vai sendo hora de cumprir as promesas. Se non é porque as teñen feito e o concello o necesita, que sexa porque un concello engalanado luce moito mellor cando está ben coidado.