A mancomunidade decidirá no pleno do vindeiro luns a distribución dos 412 colectores do lixo, que se repartirán entre os diferentes concellos que a forman

A Mariña, 5 de setembro de 2016. A Mancomunidade de Municipios da Mariña celebrará pleno o vindeiro luns, día 12, ás 20:00 horas en Barreiros. Nesa sesión abordarase entre outros temas a distribución dos 412 colectores do lixo, que se van repartir entre os diferentes concellos, así como as 247 papeleiras que se adquirirán.

O presidente, Alfredo Llano, explicou que “o venres pasado abrimos os sobres correspondentes á licitación da compra de colectores e papeleiras a través dunha subvención que solicitamos para todos os concellos de A Mancomunidade e que ten unha inversión de 120.000 euros”.

Llano contou que “había tres empresas interesadas en acudir a esta licitación e resultou elixida a empresa Veicar de A Coruña . O que se vai tratar é de que se repoñan nos concellos o antes posible unha serie de colectores. Vanse traer 220 colectores verdes de douscentos litros, outros 78 colectores verdes de menos capacidade, 77 amarelos, 18 de papel e 19 de vidro. E tamén se mercarán papeleiras: 133 dunha modalidade e 114 doutra, ademais de cinco suxeita colectores”.

O presidente da Mancomunidade de Muncipios da Mariña dixo: “pensamos que foi unha boa oferta desta empresa, e imos facer un pleno da Mancomunidade o próximo día 12 no que falaremos de todo isto e ademais tamén abordaremos o plan Avanza, que é o plan de emprego no que hai seis concellos interesados en levalo adiante. Tamén imos falar da subvención que solicitamos para actos a prol da igualdade e contra a violencia de xénero, que van facerse en todos os concellos de A Mancomunidade nestes catro meses que faltan para rematar o ano”.

Finalmente Alfredo Llano sinalou que “tamén falaremos un pouco do que é a atención temperá porque hai unha serie de concellos interesados en integrar o servizo que se está ofertando desde Burela. Pensamos que sería unha boa cousa que estean informados e os servizos que poidan utilizarse dunha maneira comunitaria que se faga da mellor maneira posible”.