O Grupo Municipal do PP de Ribadeo pide o arranxo “en condicións” da Ruta das Praias

Lugo, 28 de setembro de 2016.- O voceiro do Grupo Municipal do Partido Popular de Ribadeo, Jesús López Penabad, solicita ao Goberno da localidade o arranxo “en condicións” da coñecida como Ruta das Praias que, a través da costa, comunica os areais de Rinlo e As Catedrais.

Penabad critica o mal estado no que se atopa esta vía de titularidade municipal. “O seu firme está completamente deteriorado, con continuos baches que dificultan a circulación dos vehículos, o que entraña unha situación de perigosidade para os condutores”, explica.

O voceiro dos populares defende unha “actuación inmediata e en condicións” neste treito ao tempo que descubre “as propias contradicións” do alcalde, o nacionalista Fernando Suárez Barcia. “Estamos a recibir estradas doutras administracións, mentres o nacionalista mantén as do Concello nun estado total de abandono. O alcalde manifestou en varias ocasións as súas queixas pola extensión da rede viaria municipal, que el mesmo segue a ampliar, sen mantela en boas condicións”, analiza.

Polo tanto, o popular reitera que dende o Grupo Municipal “instámolo a que atenda ao que ten entre mans e manteña as infraestruturas viarias municipais que vertebran a localidade nas condicións esixibles e coas máximas garantías de seguridade”.

Axuda para o auditorio e compromiso da Xunta co emprego
O Grupo Municipal do Partido Popular de Ribadeo celebra a axuda concedida para o arranxo do auditorio e agradece esta subvención tanto á Deputación como ao Grupo Popular, que favoreceu esta concesión. Neste eido, López Penabad, quen explica que o auditorio require dunha actuación inmediata ao presentar un importante estado de deterioro con humidades e outras deficiencias, agarda que esta achega económica permita atallar os problemas que presenta o edificio.

Pola contra, os populares censuran que o Goberno municipal de Ribadeo estea “centrado en criticar á Xunta de Galicia de xeito continuado e non sexa capaz de agradecerlle á administración que preside Alberto Núñez Feijóo a concesión de dous obradoiros de emprego dirixido a 16 persoas”. Penabad resalta este compromiso da Xunta de Galicia coa creación de emprego na localidade, unha implicación de Feijóo con Ribadeo que, segundo o popular, “se trasladou aos últimos comicios autonómicos, nos que o PP obtivo en Ribadeo o 50,23% dos votos”. O voceiro dos populares agradece “a todos e cada un dos 2.544 votantes do PP a confianza depositada no executivo autonómico”.