O alcalde de Burela móstrase satisfeito pola entrada en servizo do acceso ao porto prevista para a primeira quincena de novembro

Burela, 27 de outubro de 2016. O alcalde, Alfredo Llano, mostra a súa satisfacción trala visita deste mércores da conselleira de Infraestruturas e o anuncio da entrada en servizo do acceso ao porto prevista para a primeira quincena do vindeiro mes de novembro. O rexedor asegura que se trata dunha obra moi importante, que favorecerá moito o desenvolvemento económico do porto. Llano tamén anunciou que o Concello vai potenciar toda a zona de paseo que vai desde o Cantiño ata o peirao e lembra que se habilitará un mirador nas inmediacións do hipocausto que se atopa preto dese acceso.

O alcalde burelés comentou que “onte estivemos mirando que o acceso ao porto vai ser unha realidade posiblemente na primeira quincena do mes de novembro, data na que quedará aberto a todo tipo de vehículos”.

Alfredo Llano salientou que “é unha obra importantísima, e eu creo que isto xera unha satisfacción colectiva extraordinaria dado que levamos moitísimo tempo con esta obra. Hai que ter en conta que son 1.260 metros de lonxitude, pero que levou tempo polas súas circunstancias especiais porque houbo bastantes a verdade é esa. Houbo cousas moi complicadas como por exemplo o cambio de trazado da vía porque había un problema pola estabilidade do chan. Foron aparecendo pouco a pouco problemas que se foron arranxando e agora estamos a piques de rematala xa para culminar esta obra, que é importantísima para o noso concello”.

O rexedor considera que “vai favorecer moitísimo o desenvolvemento económico e social do noso porto ao poder levar o noventa e nove por cen dos camións e dos vehículos pesados que circulen polo noso concello alí directamente, e saír de alí á estrada N-642 outra vez sen que vaian pola propia vila. Agora mesmo hai xente que estaba preocupada por iso e penso que se vai resolver este problema”.

O alcalde de Burela declarou que “tamén se nos vai dar quizás un problema de densidade de tráfico nalgunha zona e imos estar sobre un mes observando qué é o que ocorre con este tráfico e posiblemente haberá que regular algunha das zonas unha vez que salgan do porto para incorporarse ao casco urbano cara ao centro. Pero imos observalo porque agora hai unha previsión, pero hai que ver como se vai dando”.

Alfredo Llano engadiu: “hai que dicirlle á xente que somos moitos os afeccionados a dar paseos polos diferentes paseos marítimos, que vai haber unha zona moi bonita desde a conexión do paseo marítimo do Cantiño que vai cara ao porto, vai pasar ademais polas instalacións de hipocausto que se vai preparar para que sexan visitadas, vai haber un panel onde se vai explicar como foi localizado e para que servía. Son unhas ruínas da época romana e polo tanto pensamos que vai ser moi interesante todo o que hai alí. Ademais hai unha vista moi bonita así que pode servir de miradoiro de todo o que se ve alí do porto e do mar”.

Finalmente o rexedor burelés manifestou que “tamén cando saibamos como vai quedar todo vou reunirme con Patrimonio para favorecer unha baixada desde o hipocausto ao porto e así se fai un paseo completo. Por outro lado hai unha zona na rotonda que está conectada coa N-642 onde imos facer un paso que vai utilizar unha ponte da vía do tren para tamén enlazar co paseo marítimo. Estámonos preocupando de que por un lado o acceso ao porto sexa moi vantaxoso para o tráfico rodado, pero tamén queremos que ao mesmo tempo se poida aproveitar para toda a xente que teña ánimo de andar por esa zona que pasee da maneira máis agradable posible”.