A Mariña, 20 de decembro de 2016. A Mancomunidade de Municipios da Mariña solicitará unha xuntanza cos responsables de Adif para facerlle chegar as demandas en materia ferroviaria da Mariña luguesa. Alfredo Llano alude, entre outros, aos posibles fins turísticos do tren que percorre esta comarca. Este foi un dos asuntos que se abordou no pleno celebrado onte en Cervo, o último deste 2016, no que tamén se falou da presenza da Mariña en Fitur.
Na sesión plenaria de onte foron varios os temas que se abordaron, segundo explicou o seu presidente: “os puntos importantes eran os referidos ás achegas económicas dos diferentes Concellos. Lembrar que cada Concello paga 0´72 céntimos de euro por habitante. Hai que dicir tamén que desde a última vez que se fixo o padrón da Mancomunidade perdéronse 800 habitantes, o cal quere dicir que debemos procurar dalgunha maneira ir recuperando as mellores condicións para que a xente faga aquí o seu proxecto de vida e ir pouco a pouco ganando poboación”. E insistiu en que “poñemos cada un de nós 0´72 euros por habitante, que é a achega económica que aporta cada un dos Concellos. Esta cantidade vai en función dos habitantes. O último que ten que integrarse é Viveiro e ten aproximadamente uns 15 ou 16.000 habitantes”.
Alfredo Llano dixo que “en liñas xerais coas achegas dos Concellos, sen contar Viveiro, veñen sendo uns 42.000 ou 43.000 euros. Despois temos as subvencións que veñen da Xunta a través de Turismo, xa tivemos este ano 80.000 euros máis outros 80.000 que imos ter para o ano que ven. Tamén as achegas das diferentes subvencións como o Plan Avanza, que é o programa de emprego que estamos levando adiante seis concellos da Mancomunidade ou como poden xurdir algúns premios que temos ganado como o Premio Coopera, que foi contra a violencia de xénero e desenvolveuse durante os meses de novembro e decembro. Todo iso sumado dá o que foi o orzamento deste ano e as previsións para o ano que ven”.
O presidente da Mancomunidade considera que “para levar máis ou menos os temas ordinarios é suficiente este orzamento, aínda que nos gustaría ter máis para poder compartir servizos que foran vantaxosos para todos os concellos”.
A presenza da Mariña en Fitur foi outro dos asuntos abordados no último pleno deste 2016 na Mancomunidade de Municipios. Alfredo Llano contou que “o día 19 de xaneiro ás seis da tarde teremos a presentación de toda a riqueza patrimonial e paisaxística desta zona. Estamos barallando a posibilidade de que esa presentación en Fitur a faga algún persoeiro da Mariña, algún escritor, pintor, etc… en lugar dos alcaldes. E tamén estamos pensando a posibilidade de facer algún acto fora do que é a feira mesma, nalgún restaurante de Madrid. Si non nos dese tempo de organizalo para este vindeiro xaneiro, quedaría a idea para 2018”.
A Mancomunidade solicitará manter unha entrevista con responsables de Adif para facerlles chegar as demandas da Mariña en materia ferroviaria: “viña este tema un pouco ligado coa reclamación que facía Ribadeo e coa que tamén se fixo este último fin de semana en Lugo a través de todos os partidos políticos, asociacións e diferentes colectivos, que tamén reclaman unha mellora notoria na provincia de Lugo con respecto ao que son os servizos ferroviarios. Aquí tamén nosoutros queremos poñer o noso grao de area e facer o que se poida para lograr un servizo público na Mariña con melloras para ser aproveitadas, unha delas é a das estacións e os apeadoiros”.
Llano subliñou que “tamén queremos que o servizo sexa un beneficio claro para o turismo da Mariña. Sería interesante volver reclamar ou poñer en valor trens que son turísticos que veñen con xente especificamente para visitar o noso litoral, e que foran parando naqueles Concellos que teñen estacións. Sería bo aproveitar estes servizos para que moitos colectivos sexan estudantís ou outros que queiran viaxar, mirar a fórmula para que poidan visitar diferentes Concellos e facer viaxes turísticos, culturais e de toda índole. E outra petición que temos feito é para beneficiar o traslado e o transporte de viaxeiros que se poidan mover pola Mariña en media distancia para que moita xente que está traballando nun concello e vivindo noutro puidera desprazarse con facilidade”.
O presidente da Mancomunidade indicou que “quedamos en poñernos en contacto con responsables de Adif, a nosa intención é ter unha conversa con eles e expoñerlles todo o que estivemos falando onte. Cada Concello fará as súas suxestións e con elas manteremos unha conversa con Adif. Trataremos de chegar a un acordo, a nosa intención é promover e facilitar que o tren siga da mellor maneira posible dando servizo na comarca”.
Alfredo Llano fixo tamén unha valoración positiva do desenvolvemento do Plan Avanza, no que están a participar 6 Concellos da Mancomunidade de Municipios.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
