Lugo, 11 de agosto de 2017. O Goberno da Deputación dinamiza a economía da provincia con 80.000 euros que permiten a celebración hoxe e a fin de semana de 10 citas turísticas no conxunto do territorio lugués. Faino no marco do seu Plan Estratéxico de Turismo, que establece a promoción das singularidades dos Concellos asociadas á cultura, natureza, gastronomía ou modo de vida, como factor decisivo para atraer visitantes á provincia e xerar riqueza e emprego a través do turismo.
Deste xeito, agárdase a asistencia de milleiros de persoas á provincia, que participarán, este venres, no Rabafolc en Rábade, na Festa da Comunidade en Quiroga ou no Mercado Medieval de Mondoñedo, que comeza hoxe e se prolonga durante toda a fin de semana; o sábado, na Heroica-Gran Premio Deputación de Lugo na Ribeira Sacra, na Feira do Cabalo da Ulloa, nos Cantos de Taberna en Muras, na Feira de Produtos Artesanais de Samos, no inicio da Feira do Libro de Viveiro ou en Navia de Suarna, con actividades deportivas e fluviais; e, o domingo, na Feira de Artesanía e Gastronomía de Castroverde ou na de Ferreira de Pallares, en Guntín.
Venres, citas en Rábade, Quiroga e Mondoñedo
Hoxe, venres 12 de agosto, hai citas en Rábade e Quiroga, ao tempo que arranca a de Mondoñedo. Todo isto, grazas aos 48.000 euros que decidiu achegar o Goberno Provincial, convertendo á Deputación na principal patrocinadora do XXIII Rabafolc, da XII Festa da Comunidade no municipio quirogués e do XXVI Mercado Medieval da cidade mindoniense.
De dita cantidade, son 8.000 euros os que o Executivo Provincial achega á celebración do festival de música folk de Rábade, que prevé hoxe a asistencia dunhas 2.000 persoas para seguir os concertos gratuítos de Os Cempés, Pepe Vaamonde, Anxo Lorenzo e do grupo irlandés Dubhlinn. Outros 8.000 euros son para a XII Festa da Comunidade de Quiroga, que tamén agarda a participación este venres de centos de persoas como en anteriores edicións, que desfrutarán dun festival de música e danza tradicional a cargo de Arume da Queiruga e Danza San Martiño, así como da actuación do mago Manuel Lamas, entre outras actividades.
Hoxe e ata o domingo incluído, terá lugar o Mercado Medieval de Mondoñedo grazas aos 32.000 euros que decidiu achegar o Goberno Provincial, facendo da Deputación a administración que máis colabora con esta cita, capaz de atraer a milleiros de visitantes. A programación conta con máis de 70 actividades: actuacións musicais, demostracións artesanais, degustacións, teatro, actividades infantís…todo isto para recrear o pasado medieval da cidade mindoniense.
Sábado, citas en Monforte, Palas de Rei, Samos, Muras e Viveiro
Cun investimento de 25.000 euros, o Goberno Provincial contribúe á celebración este sábado de citas turísticas en Monforte de Lemos, Palas de Rei, Samos, Muras, Viveiro e Navia de Suarna, que atraerán a milleiros de visitantes, dinamizando a economía local.
No embarcadoiro de Doade, no municipio monfortino, 600 nadadores – xa inscritos- chegados de diferentes puntos de España e do norte de Portugal, xunto aos seus equipos, familias ou amigos, participarán na Heroica, Gran Premio Deputación de Lugo – Regina Viarum. Trátase dun evento deportivo, que tamén inclúe visitas guiadas pola Ribeira Sacra. O Executivo Provincial é o seu principal promotor con 10.000 euros.
En Vilar de Donas, Palas de Rei, terá lugar a XXVI Feira do Cabalo da Ulloa, que conta cunha achega de 3.000 euros por parte do Executivo Provincial. Participarán ducias de xinetes e máis de 60 cabezas de gando, 15 profesionais dos sectores da produción ecolóxica e da artesanía. Tamén haberá concertos, exhibicións de carros tradicionais ou contacontos.
Son 6.000 euros os que inviste o Executivo Provincial na celebración da XXI Feira de Produtos Artesanais de Samos, que contará con exposicións de produtos elaborados manualmente, actividades como a malla do cereal, bailes tradicionais…
No Concello de Muras, celebrarase a 1º edición dos Cantos de Taberna polos establecementos da localidade. Esta pioneira iniciativa conta cunha axuda de 3.000 euros por parte da Deputación e co obxectivo de dinamizar a economía local.
E en Viveiro, arrancará o sábado e ata o mércores 16 de agosto a Feira do Libro. Reunirá 10 expositores. Ofreceranse descontos do 10% nas publicacións. O Goberno da Deputación colabora con 3.000 euros coa Federación de Libreiros de Galicia.
Na Montaña, actividades deportivas fluviais
Na Montaña, concretamente en Navia de Suarna, o sábado arrancará a programación deportiva fluvial do Executivo Provincial. A praia Proba de Navia acollerá actividades gratuítas e para todos os públicos. Por exemplo, tobogáns, balancíns, pulpos, rocódromos acuáticos, pistas de obstáculos, kaiaks, waterballs… animacións musicais ou xogos populares. Todo baixo a supervisión dun coordinador e de entre 6 e 12 monitores para desfrutar do río e da súa contorna con seguridade.
Domingo, citas en Castroverde e Guntín
En Castroverde, celebrase a Feira de Artesanía e Gastronomía. O Executivo Provincial colabora cunha achega de 6.000 euros na organización desta cita, que inclúe demostracións de oficios tradicionais, maxia, actuacións musicais, degustacións de produtos típicos e ata un desfile de moda. Tamén o domingo, Ferreira de Pallares, en Guntín, haberá feira e demostracións artesanais, que organiza a Asociación de Amigos do Mosteiro coa colaboración do Goberno da Deputación.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
