Veciños independentes de Alfoz presentará mocións sobre a mellora de pontes en vías provinciais e unha senda peonil

Alfoz 22-11-17. O Grupo Municipal de Veciños Independentes de Alfoz presentará tres mocións no pleno que se celebrará o vindeiro venres 24, referidas á mellora de varias pontes nas vías provinviais LU-P-0206, LU-P-0207 e LU-P-0211, á continuación da senda peonil existente paralela ao marxe esquerdo da estrada autonómica LU-160 ata o límite co concello veciño de O Valadouro e ápolítica de prevencón de incendios forestais das diferentes administracións.

Referente á mellora de vias provinciais, desde VIA consideran que “as modificacións no trazado e anchura dalgunha destas vías e a falta de mantemento fixo que algunha das pontes exintentes sexan un punto perigoso tanto para o tráfico rodado como para os peóns”. Na moción solicitan á Deputación Provincial de Lugo que proceda ao ensanchamento das pontes descritas, así como á colocación dos correspondentes petriles de protección lateral e a rexeneración do pavimento, para corrixir as deficiencias descritas na mesma.

Noutra das mocións indican que na actualidade os veciños deben camiñar polo arcén da LU-160, xa que non hai beirarrúas en ningún dos marxes do vial ata chegar ao concello do Valadouro, o que confire “un risco para os peóns debido ao grande número de vehículos lixeiros e pesados que diariamente transitan por esta estrada”. Desde o Grupo Municipal de Veciños Independentes de Alfoz consideran que a construción do tramo restante desta senda daría lugar a que os peóns dispuxeran dun espazo seguro e cómodo polo que camiñar, respondendo ademais á demanda desta obra da que a Xunta xa prometera a súa execución no ano 2012.

Referido á política de prevención de incendios forestais, desde VIA presentarán unha moción na que consideran que non se debe tardar mais en actuar, aplicando con todo o rigor posible a normativa existente, nomeadamente a Lei 3/2007, do 9 de abril, de prevención e defensa contra os incendios forestais de Galicia e a Lei 7/2012, do 28 de xuño, de montes de Galicia, pois consideran que “aínda que os incendiarios sexan os principais culpables, tamén debemos recordar a responsabilidade que temos todas as administracións nesta loita, caendo moitas veces no erro de centrar os esforzos na extinción e non na prevención”.

ORDENANZA REGULADORA PARA A CONCESIÓN DE AXUDAS PARA O FOMENTO DA NATALIDADE E O ASENTAMENTO DE POBOACIÓN NO CONCELLO DE ALFOZ

Entre os temas a tratar no pleno levarase tamén unha proposta deseñada desde VIA co obxectivo de fomentar a natalidade e o asentamento de poboación no Concello de Alfoz, destinadas ás familias que teñan fillos/as por nacemento ou adopción e/ou establezan o seu domicilio de forma permanente no Concello de Alfoz, mediante a posta en marcha dunha ordenanza. Desde o Grupo Municipal de Veciños Independentes de Alfoz indican que se “terá dereito a percibir a correspondente axuda para os supostos que veñen recollidos nesta ordenanza que tivesen lugar a partir do día 1 de xaneiro do 2017”.