Balizado simbólico do BNG de Viveiro para demandarlle ao Concello que actúe e vele pola seguridade da súa veciñanza

Viveiro 29-1-18. O domingo, 27 de xaneiro, O BNG de Viveiro, xunto con veciños e veciñas, realizaron un “balizado simbólico” en Covas para demandarlle ao goberno local que actúe dunha vez por todas nos edificios en estado ruinoso do municipio, tales como as casas situadas na rúa Suas Barras con número 41 e 43, e tamén no edificio do antigo Hotel Cociña. “Balizamos estes inmobles simbolicamente reivindicando a falta de medidas preventivas e esiximos que garantan a seguridade dos viandantes” indicou o responsable de GN, Seve Salgueiro.
“O mal estado dos edificios supón un risco real para calquera que transite esta zona, polo que dende o Bng Viveiro instamos ao Concello a adoptar unha solución inmediata. Tal e como se detallou na proposta que presentamos o pasado 29 de decembro de 2017”, recalcou Seve Salgueiro durante a súa intervención ante a veciñanza asistente ao acto.
A organización nacionalista agarda que o goberno municipal do PSOE tome conciencia desta situación de perigo á que se ve exposta diariamente a veciñanza e transeúntes, escoite as demandas das súas veciñas e veciños e, agora que aínda está a tempo de evitar que o avanzado estado de deterioro destes inmobles poda provocar un tráxico suceso, poña en marcha as pertinentes medidas de seguridade nestas zonas de forma inminente.