O Concello pediu as autorizacións correspondentes para que os veciños poidan limpar os cauces dos ríos sen seren sancionados. Suárez Barcia subliña que hai concas que se atopan nunha situación lamentable, debido á deixadez de Augas de Galicia

Ribadeo, 28 de febreiro de 2018. O alcalde, Fernando Suárez, denuncia que hai moitos ríos que se atopan nun estado lamentable debido á deixadez de quen tivo competencias na materia ata o de agora, que é Augas de Galicia. O rexedor lembra que a última vez que este organismo atendeu os requerimentos enviados polo Concello de Ribadeo foi hai sete u oito anos. Suárez Barcia subliña que pediu autorización a Augas de Galicia e á Confederación Hidrográfica do Cantábrico (da que dependerá a metade de Ribadeo) para que veciños e veciñas poidan limpar os ríos sen seren sancionados.
Fernando Suárez declarou que “moitos ríos están en condicións lamentables di o portavoz do PP. Efectivamente, ten razón, están lamentables pola deixadez de quen ata agora tivo competencias niso, que é Augas de Galicia, da Xunta, e dado que a última vez que fixeron caso aos requerimentos do Concello, mandados en varias ocasións, foi hai aproximadamente sete ou oito anos en que pola súa conta limparon os cauces dos ríos e desbrozáronos convenientemente”.
O alcalde explicou que “agora en Ribadeo, e como non podía ser diferente ao que pasa nestes últimos anos, ningunha administración superior ao Concello, matizo, agás a Deputación de Lugo, se interesa e se preocupa polo que aquí pasa, incluíndo isto a que discuten entre elas para non facerse cargo das súas competencias, como é o caso desta materia de augas, dos ríos, etc… Estamos en terras de ninguén, ninguén nos quere como dicía o outro”.
O rexedor lembrou que “ata agora só as parroquias de Couxela e Vilaosende pertencían á Confederación Hidrográfica do Cantábrico, e o resto do concello a Augas de Galicia, da Xunta. E agora parece ser, e digo parece ser porque non está aprobado aínda que xa nolo comunicaron verbalmente non hai moitos días por parte das dúas entidades, que a Confederación Hidrográfica do Cantábrico con sede en Oviedo, vai coller moita máis superficie do termo municipal de Ribadeo, incluíndo a metade da vila”.
Para o alcalde “isto é paradóxico. Unha metade da vila de Ribadeo estará adscrita a Augas de Galicia e a outra metade estará adscrita á Confederación Hidrográfica do Cantábrico, supoño que haberá algunha rúa na que unha beirarrúa dependerá da Confederación e outra de Augas de Galicia”.
Fernando Suárez engadiu: “en relación co que de xeito brillante, vivaz e anticipado aos tempos me pide o voceiro do PP de Ribadeo, teño que dicirlle que si, que xa pedimos esa autorización de corte e de limpeza, pero pedímola aos dous organismos, á Confederación Hidrográfica do Cantábrico e a Augas de Galicia para que agora, en ausencia destas administracións que non se ocuparon nin se ocupan de nosoutros, poidan os paisanos nosos facer eses traballos de limpeza nos ríos sen ser sancionados”.