A Mariña, 18 de abril de 2018. A Mancomunidade de Municipios da Mariña celebrará pleno ordinario o vindeiro martes, 24 de abril. Nesta sesión, que terá lugar no Concello de Riotorto ás 20:00 horas, falarase de Feve, de estradas e da aplicación do Premio Coopera que acaba de recibir a Mancomunidade polo seu traballo na loita contra a violencia de xénero.
O presidente da Mancomunidade de Municipios da Mariña, Alfredo Llano, anunciou que “para o 24 de abril, que vai ser o próximo martes, imos facer un pleno ordinario da Mancomunidade para ir enfocando temas cara a este ano. Esta vez toca en Riotorto, é algo rotativo e imos por todos os concellos da Mariña. Faremos o pleno no Concello ás oito da tarde”.
Llano explicou que “levamos un orde do día que consiste basicamente en dar información de todo o que se vai facendo, e no informe da presidencia tratarei de informar sobre temas de Feve, de infraestruturas, de licitacións de empresa, de convenios que temos coa Xunta e coa Deputación, etc…, de todo aquilo que pode ser importante para toda a Mancomunidade”.
E engadiu que “tamén informarei do Premio Coopera, de cómo temos pensado desenvolver ese premio que nos deron este ano con respecto á violencia de xénero e á igualdade, e ir tratando de programar todas as actividades que corresponden á Mancomunidade. Todo isto será nese pleno ordinario ao que están invitados todos os alcaldes ou en que deleguen”.