O Observatorio da Mariña pola Igualdade convoca unha concentración en Foz como resposta ao asasinato machista do Porriño

A Mariña 19-6-18. O obxecto da concentración é rexeitar o asasinato machista de María Magdalena Moreira Alonso, de 47 anos, asasinada no día de onte a tiros polo seu marido no Porriño, o mesmo día que tiñan pensado asinar o divorcio. Convocamos a toda a sociedade para que visibilice o rexeitamento aos valores patriarcais que perpetúan e consolidan na sociedade esta violencia sexista.
Non podemos asumir a cotiandade dos asasinatos machistas cando, nos últimos cinco anos, medio cento de galegas foron asasinadas pola violencia machista e máis de setecentas no Estado. Falamos dun feminicidio invisibilizado do que estamos fartas.
Lembramos que a violencia machista é a manifestación máis terrorífca das desigualdades de xénero e que non respecta fronteiras nin culturas. Unha realidade estrutural que afecta, segundo ONU Mulleres, a un 35% das mulleres do planeta. A pesar de levar anos lexislando a favor da igualdade de xénero desde todos os niveis de goberno, consideramos que os esforzos non son sufcientes. A loita contra as violencias machistas debe ser unha prioridade institucional e política, non só nos organismos e departamentos de igualdade senón en todos os ámbitos que afectan á vida das persoas. Actuar sobre as violencias machistas supón recoñecer graves fendas de xénero no ámbito social, económico, cultural etc. e supón atallar as causas estruturais e sociais que substentan estas desigualdades a través do desenvolvemento de políticas de igualdade e do respecto minucioso aos dereitos humanos
das mulleres.
Queremos amosar o noso rexeitamento para que toda a sociedade entenda que é a nosa
vida a que está en perigo, que non lle pertencemos a ninguén e que calquera de nós pode ser a seguinte. Por iso vos convocamos a unha concentración que terá lugar o mércores, 20 de xuño, ás 20 horas na Praza Conde de Fontao, en Foz.